Tramp Qytaıdan ózge elderge tarıfterdiń engizilýin 90 kúnge kidirtti

ASTANA. KAZINFORM – AQSh prezıdenti Donald Tramp 9 sáýir kúni «ózara tarıfter boıynsha jańa baj salyǵynyń engizilýin 90 kúnge keıinge shegeretinin, biraq Qytaı taýarlaryna salynatyn salyqty odan ári arttyratynyn málimdedi.

Lianhe Zaobao basylymy AQSh-tyń ondaǵan saýda seriktesine kóp mólsherde «ózara tarıfter» engiziledi dep uıǵarylǵan mejeli sátke 24 saǵat qalǵanda Tramp ustanymyn kúrt ózgertkenin jazdy.

Ol óz málimdemesinde «álemdik naryqqa qurmetsizdik tanytqany úshin», Qytaıdan ákelinetin taýarlarǵa baǵyttalǵan tarıftiń mólsherin 104%-dan 125%-ǵa deıin kóteretinin málimdedi.

- Bul sheshim dereý kúshine enedi, — dep tolyqtyrdy ol.

Tramp 75-ten astam eldiń AQSh-pen kelissóz júrgizýge nıet bildirgenin aıtty.

- Meniń qatań eskertýimnen keıin, bul elderdiń eshqaısysy qandaı da bir tásilmen nemese formatpen Qurama shtattarǵa qarymta qaıtarǵan joq. Sondyqtan men Qytaıdan ózge elderge engiziletin tarıfterdi 90 kúnge kidirte turýǵa jáne osy aralyqta onyń mólsherin 10%-ǵa deıin tómendetýge jarlyq berdim,- dep jazdy Tramp áleýmettik jelide.

Al Aq úıdiń baspasóz hatshysy Levıttiń aıtýynsha, bul sheshim Qytaıdan basqa barlyq elge sáıkesinshe tek 10% kóleminde baj salyǵy salynatynyn bildiredi.

Degenmen, bul sharanyń qyry men syry qazirshe naqtylanǵan joq.

Atalǵan jańalyqtyń áserinen AQSh-tyń qor naryǵynda negizgi ındekster aıtarlyqtaı ósti, al oblıgatsııalardyń tabystylyǵy tańǵy aıyrbas kezindegi joǵary shekten sál tómendedi.

Buǵan deıin Qytaı bıliginiń «ózara tarıfter» saıasatyna qarsy qarymta shara qabyldaǵanyn jazǵan edik.