Tramp AQSh-tyń áskerı bıýdjetin 1,5 trln dollarǵa deıin arttyratynyn málimdedi
ASTANA. KAZINFORM — AQSh prezıdenti Donald Tramptyń aıtýynsha, AQSh-tyń 2027 jylǵa arnalǵan áskerı bıýdjeti buryn talqylanǵan 1 trln dollardyń ornyna 1,5 trln dollardy quraýy tıis. Ol bul jóninde Truth Social áleýmettik jelisindegi óziniń paraqshasynda jazdy.
Amerıkalyq kóshbasshynyń pikirinshe, mundaı sheshim álemdegi turaqsyzdyqtyń kúsheıýi jaǵdaıynda eldiń qaýipsizdigin qamtamasyz etý úshin qajet.
Tramp mundaı qorytyndyǵa AQSh bılik ókilderimen júrgizilgen uzaq keńesýlerden keıin kelgenin atap ótti.
«Senatorlarmen, kongressmendermen, mınıstrlermen jáne basqa da saıası ókildermen uzaq ári qıyn kelissózderden keıin, elimizdiń ıgiligi úshin, ásirese osy óte mazasyz ári qaýipti kezeńde, 2027 jylǵa arnalǵan áskerı bıýdjetimiz 1 trıllıon dollar emes, 1,5 trıllıon dollar bolýy kerek degen sheshimge keldim», dep jazdy Tramp.
Onyń aıtýynsha, qorǵanys shyǵyndarynyń ulǵaıýy AQSh-qa jańa deńgeıdegi qarýly kúshterdi qurýǵa jáne kez kelgen qaterden qorǵanýdy qamtamasyz etýge múmkindik beredi.
«Bul bizge kópten beri laıyq bolyp kelgen «armanymyzdaǵy qarýly kúshterdi» qurýǵa múmkindik beredi jáne eń bastysy, qarsylas kim bolsa da, bizdiń qaýipsizdigimiz ben qorǵanysymyzdy qamtamasyz etedi», dedi ol.
Tramp sondaı-aq mundaı shyǵyndardyń ósý múmkindigin kedendik tarıfterden túsetin kiristermen baılanystyrdy.
«Eger basqa elderden alynatyn tarıfterden túsip jatqan orasan zor qarjy bolmaǵanda, men 1 trıllıon dollar kóleminde toqtaǵan bolar edim. Olardyń kópshiligi buryn AQSh-ty buryn-sońdy bolmaǵan deńgeıde «tonaǵan», dedi prezıdent.
Tramp qazirgi qarjylyq jaǵdaı AQSh-qa áskerı bıýdjetti arttyrýmen qatar, ózge de mańyzdy ekonomıkalyq mindetterdi qatar sheshýge múmkindik beretinin erekshe atap ótti.
Onyń aıtýynsha, tarıfterdiń arqasynda jáne olar ákelip otyrǵan, Djo Baıden ákimshiligi kezinde oıǵa da kelmegen aýqymdy kiristerdiń nátıjesinde el 1,5 trln dollar kólemindegi qorǵanys shyǵyndary deńgeıine shyǵa alady. Sonymen qatar teńdessiz qarýly kúshterdi quryp, qaryz mindettemelerin qysqartyp, orta tabysty patrıot azamattardy eleýli dıvıdendtermen qamtamasyz etedi.
Buǵan deıin Aq úı Grenlandııany satyp alý ulttyq qaýipsizdiktiń basym baǵyty ekenin málimdep, osy maqsatqa jetý úshin AQSh qarýly kúshterin paıdalaný múmkindigi de qarastyrylyp jatqanyn habarlady.
Sondaı-aq buǵan deıin AQSh Venesýelamen baılanysty eki tankerdi quryqtady.