Qazaqstandyq stýdentter ázirlegen JI jobasy Nıý-Iorkte jeńiske jetti
ASTANA. KAZINFORM — Qazaqstandyqtardyń ázirlemesi Nıý-Iorkte ótken bedeldi Abilities Expo kórmesi aıasyndaǵy RESNA (Rehabilitation Engineering and Assistive Technology Society of North America) baıqaýynda bas júldeni jeńip aldy.
Qazaqstandyq Jan Amankeldi (KBTÝ) men AQSh-taǵy Berea College stýdenti Bogdan Mıronov fızıka pániniń muǵalimi, álemniń úzdik 50 pedagoginiń qataryna engen Ashat Jumabekovtyń jetekshiligimen Kozha atty tegin platformany ázirledi. Jasandy ıntellektke negizdelgen bul joba oqý lektsııalaryn, mátinder men vıdeolardy naqty ýaqyt rejıminde ym-ıshara tiline aýdarady.
Joba jetekshisi Ashat Jumabekovtyń aıtýynsha, qazaqstandyq komandanyń Nıý-Iorktegi fınalǵa shyǵýynyń ózi tarıhı jetistik bolsa, jeńiske jetýi — el ǵylymy men jastar áleýetiniń aıqyn kórinisi. Baıqaý qorytyndysy boıynsha komanda ondaǵan elden kelgen qatysýshylar arasynan ozyp shyǵyp, Joey Wallace Educational Scholarship Fund qorynan 1000 dollar kólemindegi bas júldeni ıelendi.
Búginde álemde 430 mıllıonnan astam adam estý qabiletiniń aıtarlyqtaı tómendeýimen ómir súredi. Qazaqstanda ǵana 5 myńnan astam sańyraý jáne nashar estıtin bala bilim alyp jatyr, alaıda bilikti sýrdoaýdarmashylar áli de jetkiliksiz.
Osy turǵyda Kozha platformasy jaı ǵana IT-joba emes. Bul — bilimge teń qoljetimdilikke jol ashatyn, ınklıýzıvti qoǵam qalyptastyrýǵa baǵyttalǵan mańyzdy qadam. Joba sańyraý jáne nashar estıtin balalar úshin sapaly bilim alýǵa naqty múmkindik beredi.
Eske sala keteıik, buǵan deıin CyberShield-2026 hakatony boıynsha Qazaqstannyń úzdik IT stýdentteri anyqtalǵan bolatyn.
