Tramp AQSh-taǵy ınflıatsııany jeńgenin málimdedi
ASTANA. KAZINFORM – Donald Tramp Detroıt ekonomıkalyq klýbynda sóılegen sózinde AQSh tarıhyndaǵy eń kúshti jáne eń jyldam ekonomıkalyq órleý týraly jarııalady, dep habarlaıdy NDTV.
Aq úı basshysy óz ákimshiliginde qarqyndy ósim, ónimdiliktiń, ınvestıtsııalardyń artýy, tabystyń ósýi jáne ınflıatsııany jeńý baıqalyp otyrǵanyn habarlady. Importtyq taýarlarǵa, ásirese avtomobılderge engizilgen joǵary baj salyǵy barlyq salalarda ınvestıtsııalardyń rekordtyq ósimine jáne jalaqynyń ósýine ákeldi.
- Amerıkalyq kólik óndirýshiler qazir 70 mlrd dollardan astam jańa ınvestıtsııa alyp jatyr, bul aqshanyń kóp bóligi álemniń avtomobıl astanasy Detroıtqa túsip otyr, - dep habarlady Donald Tramp.
Tramp tarıftik saıasatqa qatysty sózinde onyń aıtarlyqtaı qarjylyq paıda ákelgenin málimdedi.
- Ol Qurama Shtattar qazynasyna júzdegen mıllıard dollar ákeldi, ınflıatsııany tejeýge kómektesti jáne federaldy bıýdjet tapshylyǵyn tańqalarlyq 27%-ǵa azaıtty jáne bul qysqa merzimde ǵana boldy, - dedi AQSh prezıdenti.
Tramp synshylardyń tarıftik saıasatqa qatysty barlyq boljamy oryndalmaǵanyn atap ótti.
- Faktiler tarıfterdi amerıkalyq tutynýshylar tólep otyrmaǵanyn senimdi túrde dáleldedi. Olardy shetelder men deldaldar tólep otyr. «Sarapshylar» delinetinderdiń 100% qateleskeni, al Tramptyń aıtqany durys bolǵany kezekti ret dáleldendi, - dep atap ótti Aq úı basshysy.
Tramp saılaýaldy ýádelerin oryndaǵanyn málimdedi.
- Sońǵy 12 aıda men 2024 jyly sizderge osynda bergen ýádelerimniń barlyǵyn derlik oryndadym. Men sizge Amerıka tarıhyndaǵy eń iri salyq jeńildigin usyndym, - dep qosty Donald Tramp.
Baıden ákimshiligin synǵa alǵan Tramp óz ákimshiligi Amerıkanyń saýda teńgerimsizdigin kúrt tómendetkenin málimdedi.
- Baıden tusynda biz tarıhtaǵy eń úlken saýda tapshylyǵyna tap boldyq, jyl saıyn 1 trln dollardan astam shyǵynǵa ushyradyq. Biz bul úlken saýda tapshylyǵyn qysqa merzimde 62%-ǵa azaıttyq, - dep atap ótti AQSh prezıdenti.
Sheteldik ınvestıtsııalarǵa qatysty Tramp: «Baıden ákimshiliginiń tórt jylynda olar AQSh-qa 1 trln dollardan az jańa ınvestıtsııa tartty. Bir jyldan az ýaqyt ishinde men búkil álemnen 18 trln dollardan astam ınvestıtsııa tarttym – bul kez kelgen el úshin rekordtyq kórsetkish, - dedi.
Buǵan deıin prezıdent Donald Tramp respýblıkashyldarǵa bıylǵy aralyq saılaýda Kongresti baqylaýda ustaı almasa, demokrattar oǵan taǵy da ımpıchment jarııalaıtynyn eskertkenin jazǵan edik.