Tramp AQSh pen Iran arasyndaǵy kelissózder demalys kúnderi jalǵasatynyn málimdedi
ASTANA. KAZINFORM — Tegeran men Vashıngton dıalogy osy aptanyń sońynda jalǵasady, dep habarlaıdy Report.
Bul týraly AQSh prezıdenti Donald Tramp Fınıks qalasynda (Arızona shtaty) BAQ ókilderine málimdedi.
— Aqyldasý protsesi jalǵasyp jatyr. Ol demalys kúnderi de ótedi, — dedi amerıkalyq kóshbasshy.
Ol taraptardyń ustanymdarynda áli de kereǵarlyq bolýy múmkin ekenin joqqa shyǵarmady.
— Múmkin, olar bar shyǵar — oqıǵalardyń qalaı órbıtinin kóremiz. Eger bar bolsa, biz olardy eńserýimiz kerek. Degenmen, aıtarlyqtaı qarama qaıshylyqtar kóp qalmaǵan dep oılaımyn, — dedi Aq úı basshysy.
Ol sondaı-aq kelisimge qol jetkizilgennen keıin Parsy shyǵanaǵyndaǵy Irannyń teńiz porttaryna qoıylǵan blokada alynatynyn da jetkizdi.
Sonymen qatar, ABC News telearnasyna bergen jeke suhbatynda Iranmen kelissózderdi Islamabad qalasynan basqa jerde jalǵastyrý múmkindigin joqqa shyǵardy.
— Kelissózder tek Islamabadta ótýi kerek. Maǵan kómektespegen elderge barýǵa múddeli emespin. Stıv Ýıtkoff (AQSh prezıdentiniń arnaıy ókili), Djared Kýshner barady. Múmkin Djeı Dı Vens (vıtse-prezıdent) te barar, bul týraly Djeı Dımen áli sóılesken joqpyn, — dedi Tramp.
Taıaý Shyǵystaǵy shıelenisti dıplomatııalyq jolmen retteýge baǵyttalǵan mańyzdy qadam jasaldy. AQSh prezıdenti Donald Tramp Iranǵa soqqylardy ýaqytsha toqtatýǵa daıyn ekenin málimdegennen keıin, Tegeran resmı túrde eki aptalyq bitim sharttaryn qabyldady.
Iran men AQSh Pákistandaǵy kelissózderde soǵysty toqtatý týraly kelisimge kele almady.
