«Tóraǵalyq tórinde - 100 kún» - respýblıkalyq basylymdarǵa sholý
ASTANA. Sáýirdiń 10-y. QazAqparat. Qazaq aqparat agenttigi respýblıkalyq basylymdarda sáýirdiń 10-y, senbi kúni shyqqan ózekti materıaldarǵa sholýdy usynady.
«Túrkııa tarapynyń bastamasy boıynsha Qazaqstan Prezıdenti Nursultan Nazarbaev pen Túrik Respýblıkasynyń Prezıdenti Abdolla Gúl telefon arqyly sóılesti», dep jazady «Egemen Qazaqstan» gazeti QR Prezıdentiniń baspasóz qyzmetine silteme jasap.
Memleket basshylary Qyrǵyzstandaǵy jaǵdaıdy talqylap, bul elde turaqtylyq pen quqyqtyq tártiptiń tezirek qalpyna kelerine degen senimderin bildirdi.
Áńgimelesý barysynda ekijaqty qarym-qatynastardyń búgingi jaı-kúıi men keleshegi jóninde sóz boldy. Aǵymdaǵy jyldyń mamyr aıynda Abdolla Gúldiń Qazaqstanǵa jasaıtyn saparynyń mańyzdylyǵy atap ótildi. Vashıngtonda ótetin ıAdrolyq qaýipsizdik jónindegi ǵalamdyq sammıt sheńberinde Nursultan Nazarbaevtyń Túrkııa premer-mınıstri Redjep Erdoǵanmen kezdesýi josparlanǵan.
«Egemen Qazaqstan» gazetiniń senbilik nómirinde «Tóraǵalyq tórinde - 100 kún» degen taqyryppen maqala jarııalandy. «Qazaq eliniń EQYU-ǵa tóraǵalyqqa saılanýy búgingi jas egemen elderdiń eýropalyq úlgige saı keletin demokratııa qura alatynyn, osy baǵytta aýyz toltyryp aıtarlyqtaı jetistikterge qol jetkizgendigin resmı túrde tanytty. Qazaqstan burynǵy Keńester Odaǵy quramyndaǵy elder ishinen tuńǵysh ret EQYU-ǵa tóraǵalyq etýshi memleket bolǵanymen, Uıymǵa múshe memleketter bizdiń eldiń kıkiljińderdi sheshýge degen yqylasyna, umtylysyna oń baǵa berýde. Grekııa óziniń tóraǵalyq etken ýaqytynda Uıymnyń sheshimderdi oryndata alatyn kúshiniń joqtyǵyna kóńil aýdarmady. Al álemde Qazaqstannyń saıası jáne ekonomıkalyq salmaǵy basqasha baǵalanady» dep jazady basylym.
Sondaı osy basylymnan elimizdiń EQYU-ǵa tóraǵalyq etýine qatysty maqalalar toptamasymen de tanys bola alasyzdar.
«Bas múftı, sheıh Ábsattar qajy Derbisáli hazret Germanııanyń Qazaqstandaǵy jyly aıasynda osy eldiń «Germanııa-Qazaqstan qoǵamy» men «Jańa shyǵys ortalyǵynyń» shaqyrýymen Berlınde bolyp, Germanııa astanasynyń zııaly qaýymymen kezdesý ótkizdi», dep jazady «Egemen Qazaqstan» gazeti. Sheıh Ábsattar qajy Derbisáli hazret «Qazaqstandaǵy ıslam dini: órkendeýi men damýy» atty baıandama jasady. Bas múftı jalpy Qazaq eliniń rýhanı, mádenı, ǵylymı tarıhyna sholý jasaı kele, Qazaqstannyń dini, dili, keshegisi men búginine toqtaldy. Elimizdiń salt-dástúri, ótkeni men keleshegi de asyl dinimiz jáne onyń mádenıetimen bite qaınasyp jatqandyǵy, qazaq halqynyń ózindik ádebıeti men mádenıeti bar órkenıetti el ekendigin qadap aıtty. Qazaq jerinen búkil álemge áıgili Ábý Nasyr ál-Farabı, Qaýam ad-Dın ál-Itqanı ál-Farabı at-Túrkistanı, Husam ad-Dın Syǵnaqı, Muhammad Haıdar Dýlatı sekildi máshhúr ǵalymdar shyqqandyǵyn aıta otyryp, olardyń shyǵarmashylyǵyna toqtaldy.
***
«Aıqyn» gazetiniń jazýynsha, Birikken Arab Ámirlikterinde qazaqstandyq «Alıans bank» basqarmasynyń burynǵy tóraǵasy Erik Sultanqulov qamaýǵa alynǵan. «Interpoldyń Qazaqstan ulttyq ortalyq bıýrosynyń suratýy boıynsha sáýirdiń 8-inde Erik Sultanqulov Birikken Arab Ámirlikteriniń aýmaǵynda ustaldy. Qazir ony Qazaqstan Respýblıkasyna ekstradıtsııalaý jumystary júrgizilýde», deıdi basylym QR Іshki ister mınıstrliginiń baspasóz qyzmetine silteme jasap.
«Grýzııa qazaq ınvestıtsııasyna zárý». «Aıqyn» gazetiniń senbilik nómirinde osy taqyryppen jaryq kórgen maqalaǵa elimizge kelgen Grýzııa úkimetiniń basshysy Nıkoloz Gılaýrıdiń sapary arqaý bolǵan. Basylymnyń jazýynsha, ol óziniń qazaqstandyq áriptesimen keńeıtilgen quramdaǵy kelissózderi kezinde «Qazaqstan keleshekte de Grýzııa ekonomıkasyn ınvestıtsııalaýdy jalǵastyratyndyǵyna senetindigin» málimdegen. Mártebeli meımannyń elimizge sapary jaıynda basylymnyń senbilik nómirinen keńinen oqı alasyzdar
Grýzııa úkimeti basshysynyń Qazaqstanǵa sapary jaıynda egjeı-tegjeıli jazylǵan kelesi maqala «Alash aınasy» gazetinde «Qazaq astyǵy úshin Gúrjistanda qoıma salynady» degen taqyryppen berilgen.
«Mártebeli qonaq qazaqstandyq kompanııalardy óz eliniń týrızm, energetıka jáne aýyl sharýashylyǵy salalaryna ınvestıtsııa quıýǵa shaqyra kelipti. «Qazaqstandyq kompanııalar bizde ártúrli salalarǵa edáýir qarjy jumsap otyr. Biz bolashaqta mundaı sharýalar jalǵasyn taýyp, arta túsedi degen úmittemiz. Bizde mundaı salalardyń mańyzy óte joǵary», dep aǵynan jarylǵan meıman bul saparyna erekshe mán beretinin aıtyp jatty», dep jazady basylym.
«Keshe Qazaqstan Prezıdenti jumys babyndaǵy saparymen Brıýsselge attandy. Sapar baǵdarlamasynda N.Nazarbaevtyń Eýropalyq keńes pen Eýropalyq ınvestıtsııalyq banktiń basshylyǵymen kezdeýleri josparlanǵan», dep jazady «Aıqyn» gazeti. Eýropadan Qazaqstan Prezıdenti AQSh-qa attanady, onda ol qaýipsizdik máseleleri jónindegi ǵalamdyq sammıtke qatyspaq.
***
«Almaty - Bishkek áýe qatynasy ýaqytsha toqtatyldy», dep jazady «Alash aınasy» gazeti. Basylymnyń habarlaýynsha, Qyrǵyzstandaǵy saıası-áleýmettik jaǵdaıdyń shıelenisýine baılanysty «Eır Astana» áýe kompanııasy sáýirdiń 8-19-y aralyǵynda Almaty-Bishkek-Almaty baǵytyndaǵy áýe baılanysyn ýaqytsha toqtatady. Bul shara jolaýshylar men ushaqtar qaýipsizdigin qamtamasyz etý maqsatynda jasalyp otyr.
