TopIQ Smart Class: Astanada oqýshylar smart partalarda bilim ala bastady
ASTANA. KAZINFORM — Elordadaǵy № 99 orta mektepte zamanaýı tehnologııalarmen jabdyqtalǵan, oqý protsesin jańa deńgeıge kóterýge baǵyttalǵan ınnovatsııalyq bilim berý keńistigi ashyldy. TopIQ Smart Class pılottyq jobasy qala ákimdiginiń bastamasymen engizilip otyr, dep habarlaıdy Úkimettiń baspasóz qyzmeti.
QR Premer-mınıstriniń orynbasary — mádenıet jáne aqparat mınıstri Aıda Balaeva ashyq sabaq barysynda jańa júıeniń múmkindikterimen tanysty. Sabaqta ınnovatsııalyq synyptyń negizgi fýnktsııalary men bilim berý protsesindegi praktıkalyq áleýeti kórsetildi.
TopIQ Smart Class — ózara baılanysta jumys isteıtin smart ústel, smart partalar men smart taqtadan turatyn birtutas tsıfrlyq ekojúıe. Júıede oqý protsesin avtomattandyrýǵa jáne ony ár oqýshynyń bilim deńgeıi men jeke ereksheligine qaraı beıimdeýge múmkindik beretin jasandy ıntellekt tehnologııalary da qoldanylady. Munyń bári tıimdi, ınteraktıvti ári derbes bilim berý ortasyn qalyptastyrýǵa baǵyttalǵan.
Aıda Balaeva bilim berý protsesine ınnovatsııalyq tehnologııalar men jasandy ıntellekt quraldaryn engizý máselesine jan-jaqty ári baıyppen qaraý qajet ekenin atap ótti. Onyń aıtýynsha, eń aldymen mundaı sheshimderdiń balalardyń bilim sapasyna áseri eskerilýi tıis.
— Mundaı oıyn jáne tsıfrlyq formattardyń oqý protsesine qalaı yqpal etetinin naqty túsiný mańyzdy. Dástúrli oqytý júıesi de óz mánin saqtaýy kerek. Pánderdi oqytýda saralanǵan tásil qoldanylyp, ár balanyń jeke ereksheligi eskerilýi qajet. Ustazdyń basty mindeti — tek bilim berý ǵana emes, sonymen qatar tulǵa qalyptastyrý, jaýapty ári laıyqty azamat tárbıeleý. Osyǵan baılanysty mundaı tehnologııalardyń artyqshylyqtary men yqtımal táýekelderine keshendi taldaý júrgizý mańyzdy, — dedi Úkimet basshysynyń orynbasary.
Innovatsııalyq synyp 25 smart partamen jabdyqtalǵan. Ár parta oqýshyǵa jeke tsıfrlyq jumys keńistigin usynady. Oqýshylar osy qurylǵylar arqyly elektrondy oqýlyqtarmen jumys istep, tapsyrmalar oryndaıdy, mýzykalyq aspaptardy meńgeredi, sondaı-aq 3D sýret salý jáne modeldeý daǵdylaryn damytady.
Jasandy ıntellekt júıesi oqýshylardyń úlgerimin taldap, olardyń daıyndyq deńgeıine qaraı tapsyrmalardy avtomatty túrde beıimdeıdi. Al, pedagog smart ústel arqyly ár oqýshynyń jumysyn naqty ýaqyt rejıminde baqylap, oqý qarqynyn retteı alady jáne qajet kezde qoldaý kórsetedi. Sonymen qatar AI negizindegi analıtıkalyq derekter ár balanyń oqý dınamıkasyn obektıvti baǵalaýǵa múmkindik beredi.
Smart taqta sabaqtardy tolyq ınteraktıvti formatta ótkizýge jol ashady. Onyń kómegimen oqý materıaldaryn tsıfrlyq formatta saqtap, qaıta paıdalanýǵa, sondaı-aq oıyn jáne jarys elementteri bar sabaqtar uıymdastyrýǵa bolady.
Joba zamanaýı ınteraktıvti bilim berý ortasyn qalyptastyrýǵa, bilim sapasyn arttyrýǵa jáne jańa býynnyń tsıfrlyq quzyretterin damytýǵa baǵyttalǵan.
Budan buryn búgin Úkimette QR Premer-mınıstriniń orynbasary – mádenıet jáne aqparat mınıstri Aıda Balaevanyń tóraǵalyǵymen balalardyń jazǵy demalysyn uıymdastyrý jónindegi respýblıkalyq shtabtyń otyrysy ótkenin jazdyq.
