Tımýr Súleımenov tarıfterdi tómendetý úshin ne istedi
Otyrysta Tımýr Súleımenov monopolısterdiń turǵyn úı-kommýnaldyq sharýashylyǵy, elektr, kómir, jylý, sý, gazben jabdyqtaý, káriz, telefon baılanysy, ınternet, lıftterge qyzmet kórsetý, qoqys shyǵarý salasyndaǵy qyzmetterine tarıfterdi tómendetý maqsatynda atqarylǵan sharalarǵa toqtaldy.
«Birinshiden, búgingi kúni jylý, sý jáne elektr energııasymen qamtý salasyndaǵy 32 monopolıst boıynsha tarıfterdi 20,3 mlrd teńge somasyna, onyń ishinde sońǵy eki aptada 6 sýbekti boıynsha 1,9 mlrd teńgege tómendetý týraly sheshimder qabyldandy. Ekinshiden, monopolısterdiń negizsiz alǵan kiristerin anyqtaý jáne olardy tutynýshylarǵa qaıtarý maqsatynda monopolısterge jospardan tys 33 tekserý bastaldy. Jospardan tys taǵy 24 tekserý bastalatyn bolady»,- dedi ol.
Úshinshiden, onyń aıtýynsha, Energetıka mınıstrligimen birge elektr energııasyna jáne gazǵa arnalǵan kóterme baǵalardy tómendetý jumysy júrgizilýde. Kóterme baǵalar túsirilgen kezde mınıstrlik sońǵy tutynýshylar úshin bólshek baǵalardy arzandatý boıynsha jumysty júrgizetin bolady.
«19 qarashada mınıstrlikte oblystardyń jáne Astana, Almaty men Shymkent qalalarynyń ákimdikterimen jylýmen jáne sýmen qamtý, elektr energııasyn taratý jáne jabdyqtaý, qoqysty shyǵarý, páter ıeleriniń kooperatıvi, lıft qyzmetterine, sondaı-aq avtobýs, trolleıbýs jáne tramvaı tasymaldary qyzmetterine ákimdikterdiń baǵalardy tómendetý boıynsha jumys júrgizý qajettiligi týraly selektorlyq keńes ótkizildi»,- dedi Tımýr Súleımenov.
Mınıstrdiń aıtýynsha, qazirgi ýaqytta Jambyl oblysynyń ákimdiginen ǵana baǵalardy tómendetý jóninde júrgizilgen jumys týraly aqparat kelip túsken. Oǵan sáıkes oblysta 2018 jyldyń 1 jeltoqsanyna deıin páter ıeleriniń kooperatıvi qyzmetterine baǵa - 6,7, qoqys shyǵarý qyzmetterine - 5, lıft qyzmetterine 7 paıyz arzandaıdy.
«Qalǵan ákimdikter júrgizilgen jumys týraly aqparattar usynǵan joq»,- dedi ol.
