Mıhaıl Kýkýshkın Qytaıdaǵy týrnırde jergilikti tennısshini jeńdi
ASTANA. KAZINFORM — Qazaqstandyq tennısshi, álemniń 281-raketkasy Mıhaıl Kýkýshkın Ýsı (Qytaı) ATP Challenger 100 týrnıriniń 1/8 aınalymyna shyqty.
Qazaqstandyq sportshy bastapqy kezdesýin reıtıngide 798-oryndaǵy qytaılyq, 20 jastaǵy Tıanhýeı Chjanmen ótkizdi.
Birinshi partııada 38 jastaǵy Kýkýshkın taı-breıkte tabandylyq tanytty – 7:6 (7:4). Ekinshi set sál ońaılaý tıdi – 6:3.
Bir saǵat 35 mınýtqa sozylǵan básekede M.Kýkýshkın 1 eıspen birge 6 breık-poınttyń tórteýinde múlt ketken joq. Chjan 1 eıs, 2 breıkpen shekteldi.
Mıhaıl Kýkýshkınniń kelesi aınalymdaǵy qarsylasy keıin belgili bolady.
Búgin jańartylǵan ATP reıtıngisinde M.Kýkýshkın 282-den 281-ge aýysty.
Qazaqstannyń birinshi raketkasy Aleksandr Býblık 11-orynda qalsa, Aleksandr Shevchenko 82-den 85-ke tómendedi.
Tımofeı Skatov 198-den 188-ge, Beıbit Juqaev 300-den 297-ge joǵarylady.
Eske sala keteıik, budan buryn Elena Rybakınanyń WTA chempıondyq kestesinde kósh bastap kele jatqanyn jazǵan edik.
