Tesla Ilon Mask úshin 29 mlrd dollar kóleminde jańa syıaqyny maquldady

ASTANA. KAZINFORM — Tesla dırektorlar keńesi Ilon Masktiń kompanııada keminde eki jyl jumys isteýi shartymen oǵan 30 mlrd dollarǵa jýyq aktsııasyn usyndy.

Business Insider jazǵandaı, dırektorlar keńesi muny «jasandy ıntellekt salasyndaǵy talanttar úshin únemi ósip kele jatqan soǵys» jaǵdaıynda Maskti «ustap qalý jáne yntalandyrý» maqsatymen amerıkalyq mıllıarderdiń «adal jumysy» úshin jańa ótemaqynyń jańa paketi dep atady. 

— Óte daryndy tulǵalar tobynyń ishinde kóshbasshylyq tájirıbe, tehnıkalyq bilim jáne, múmkin, eń bastysy, ártúrli salalarda eń revolıýtsııalyq jáne tabysty bıznes qurýda kópjyldyq tájirıbesiniń tamasha úılesimi boıynsha Ilonmen eshkim teńese almaıdy, — delingen kompanııanyń dırektorlar keńesiniń hatynda.

2018 jyly Tesla aktsıonerleri Mask úshin 56 mlrd dollar kólemindegi rekordtyq syıaqy paketin maquldady, biraq ótken jyly Delaver shtatynyń sýdıasy Tesla keńesiniń maquldaý protsesi durys emes jáne aktsıonerler úshin ádiletsiz boldy dep bul sheshimdi joıdy. Mıllıarder bul sheshimge naýryz aıynda shaǵym túsirgen. Sot qaraýy áli jalǵasyp jatyr.

Eger sot burynǵy syıaqy paketin qalpyna keltirý týraly sheshim qabyldasa, Mask jańa bonýstan bas tartýǵa májbúr bolady. 

Bul jańalyq shyqqan soń Tesla aktsııalary 2%-ǵa qymbattady.

Ilon Mask — Forbes Real-Time Billionaires jahandyq reıtıngi boıynsha álemdegi eń dáýletti adam. Onyń baılyǵy 401 mlrd dollarǵa baǵalanyp otyr.

Osyǵan deıin Samsung pen Tesla 16,5 mlrd dollarlyq chıpterdi jetkizý kelisimshartyna qol qoıǵanyn jazǵanbyz.