Temirtaýda Jedel basqarý ortalyǵy iske qosylady
ASTANA. KAZINFORM — Qaraǵandy oblysynyń bas polıtseıi Negmet Ismagýlov jumys saparymen Temirtaý qalasynda boldy.
Polisia.kz málimetinshe, Polıtsııa polkovnıgi qalalyq polıtsııa basqarmasynyń ǵımaratynda bıyl iske qosylatyn Jedel basqarý ortalyǵynyń jumysymen tanysty.
Jedel basqarý ortalyǵyna qala boıynsha ornatylǵan segiz myńnan astam beınebaqylaý kameralarynyń úsh myńǵa jýyǵy qosylatyn bolady. Sonyń nátıjesinde tártip saqshylary qalanyń krımınogendik ahýalymen qosa, bilim berý uıymdary jáne bala baqshalardaǵy qaýipsizdikti de qadaǵalaı alady.
Jedel basqarý jáne sıtýatsııalyq ortalyqtyń jumystaryn qadaǵalap, jaqyn arada iske qosýdy tapsyrǵan óńirdiń bas polıtseıi polıtsııa basqarmasynyń májilis zalynda jeke qurammen kezdesti. Ondaǵy maqsat — tártip saqshylaryna ishki ister mınıstriniń qoıǵan tapsyrmalaryn jetkizip, qoǵamdyq qaýipsizdikti qamtamasyz etý baǵytynda mindetter júkteý.
— Ár qylmystyń artynda adam taǵdyry tur. Sondyqtan biz qylmysty ashý jáne quqyq buzýshylyqtyń aldyn alý baǵytynda tıisti jumystardy júrgizýimiz kerek. Joldaǵy qaýipsizdik te basty nazarda bolýy qajet, — dedi Negmet Ismagýlov.
Statıstıkalyq málimetterge súıener bolsaq, Temirtaý qalasynda tártip saqshylarynyń atqarǵan jumystarynyń nátıjesinde aýyr jáne asa aýyr qylmystardyń sany azaıyp, densaýlyqqa aýyr zııan keltirý, alaıaqtyq, ınternet-alaıaqtyǵy sııaqty qylmystardyń tirkelýi tómendegen. Osy baǵyttaǵy jumystardy jandandyryp, qoǵamdyq oryndarda jasalatyn qylmystardy azaıtýdy tapsyrǵan departament bastyǵy bıylǵy jyl mınıstrdiń nusqaýymen «Profılaktıka jyly» bolyp jarııalanǵanyn da eske saldy.
Budan buryn Ózbekstanda qaraqshylyq jasaǵan sheteldikter el aýmaǵynda ustalǵanyn habarladyq.