Temirtaýda synaq rejıminde tramvaı iske qosyldy
TEMІRTAÝ. KAZINFORM – Temirtaýda qala kúninde kóshe boıymen jańa ádemi tramvaı júrip ótti. Ol synaq rejıminde iske qosyldy. Aldaǵy ýaqytta taǵy birneshe jol jáne elektr ınfraqurylymy synaqtan ótedi. Jyl sońyna deıin turaqty qozǵalys bolady dep josparlanyp otyr. Bul týraly Qaraǵandy oblysynyń ákimdigi habarlady.
Temirtaýda tramvaılar 2023 jyldyń aqpan aıynda júrýin toqtatty. Ekologııalyq kóliktiń jumysyn qalpyna keltirý metallýrgııa kombınatynyń jańa ıesi – Qarmet kompanııasynyń basym áleýmettik bastamalarynyń birine aınaldy. Osy jyldyń kókteminde temirjol jelisin aýystyrý bastaldy. Búgingi tańda 15,3 shaqyrymǵa jańa relster tóseldi. Jumys jalǵasady.
Qala boıynsha 8 jańa zamanaýı vagon júre bastaıdy. Olardyń árqaısysy úshin jeke dızaın jasalǵan. Sýretterdiń taqyryby – tseh jáne kombınat óndirisi, vagondardyń biri Temirtaý qalasyna arnalady.
Tramvaılardyń syrty ǵana ádemi emes, sonymen qatar ishi de jaıly. Kólik kondıtsıonerlermen, qaýipsizdik jáne jylytý júıelerimen, LED-jaryqtandyrýmen jabdyqtalǵan. Tómen eden jáne jınalmaly pandýstar erekshe qajettilikteri bar jolaýshylarǵa yńǵaıly ári sapar shegýdi qol jetimdi etedi.
Qarmet Temirtaý joǵary polıtehnıkalyq kolledjimen birlesip tramvaı júrgizýshilerin oqytý baǵdarlamasyna qabyldap, jumysqa ornalasýǵa kepildik beretini týraly jarııalady. 12 adamnan qurylǵan alǵpshqy topty qazan aıynda qurylyp, kompanııa qarajaty esebinen ashylmaq.
