Temeki satyp alǵanda qujat kórsetý kerek pe

NUR-SULTAN. QazAqparat – Saýda jáne ıntegratsııa mınıstri Baqyt Sultanov temeki men alkogoldik ónimderdi satyp alý kezinde qujatty kórsetý talaptaryn túsindirdi, dep habarlaıdy QazAqparat tilshisi.

Ortalyq kommýnıkatsııalar qyzmetindegi baspasóz máslıhatynda mınıstrden QR Halyq densaýlyǵy jáne densaýlyq saqtaý júıesi týraly kodeksine engizilgen keıbir ózgertýlerden keıin temeki satyp alý kezinde satyp alýshy qandaı áreketter jasaýy tıis ekendigi suraldy.

«Kodekske temeki men alkogoldik ishimdikti satyp alatyndardy azaıtýǵa yqpal etý boıynsha sharalarǵa baılanysty ózgertýler engizildi. Ásirese, kámeletke tolmaǵandardy osy ónimnen shettetý eskerilgen. Sondyqtan tıisti norma paıda boldy. Joǵary deńgeıdegi zańnamalyq aktilerge engizilgen kez kelgen ózgerister jalpy sıpatqa ıe, al keıinnen zańǵa táýeldi normatıvtik quqyqtyq aktiler (Úkimet qaýlysy men mınıstrlikter buıryqtary) túsiniktemelik ári naqtylaýshy sıpatta bolady. Osy oraıda bizdiń buıryqqa ózgertýler engizý boıynsha jumysty atqardyq, ıaǵnı bul qadamdar satýshylarǵa osy normany paıdalanýdyń mán-jaıyn túsindirý úshin iske asyryldy. Sáıkesinshe, satýshylarǵa naqty túsindirý sharalary jasaldy. Jeke kýálik satyp alýshynyń jasyna qatysty kúmán bolǵanda ǵana talap etiledi», - dedi Baqyt Sultanov.

Aıta keteıik, jaqynda Saýda mınıstrligi alkogol men temeki ónimin satýǵa qatysty ishki saýda erejelerine ózgeris engizdi, alkogol men temekini satyp alýshynyń 21 jasqa tolǵanyna satýshynyń kúmáni bolǵan jaǵdaıda ǵana jeke basyn kýálandyratyn qujatty talap etedi.