Qaraǵandy-Suryptaý stantsııasynda jol monteri qaza tapty
QARAǴANDY. KAZINFORM - Qaraǵandydaǵy temirjolda qaıǵyly oqıǵa tirkeldi. 3 mamyrǵa qaraǵan túni jol monteri kóz jumdy. Atalǵan fakti boıynsha qylmystyq is qozǵalyp, oqıǵanyń mán-jaıyn polıtsııa men «Qazaqstan temir joly» mamandary anyqtap jatyr.
Qaraǵandy-Suryptaý temirjol stantsııasyndaǵy adam ólimine qatysty oqıǵa boıynsha tergeý bastaldy. Kóliktegi polıtsııa departamentiniń málimetinshe, abaısyzda adam ólimine ákelgen temirjol kóligin paıdalaný nemese qozǵalys qaýipsizdigi qaǵıdalaryn buzý deregi boıynsha qylmystyq is qozǵalǵan.
— Bıylǵy 3 mamyr kúni Qaraǵandy-Suryptaý stantsııasyndaǵy kóliktegi polıtsııa basqarmasy qylmystyq is qozǵady. Qazirgi ýaqytta is boıynsha qajetti tergeý amaldary júrgizilip jatyr, - dep habarlady vedomstvodan.
Aldyn ala málimet boıynsha, qaza tapqan azamat jol monteri bolǵan.
Oqıǵaǵa baılanysty «Qazaqstan temir joly» UK» AQ da túsinikteme berdi.
— 2026 jylǵy 3 mamyrda saǵat 02:03-te Jańa-Qaraǵandy stantsııasynda jol monterin basý oqıǵasy boldy. Oqıǵa týraly Qaraǵandy-Suryptaý stantsııasyndaǵy jelilik polıtsııa bólimine habarlandy. Qazirgi ýaqytta oqıǵanyń sebepteri men mán-jaıy anyqtalyp jatyr. Oqıǵa ornyna kompanııanyń bas ınjeneri bardy, - dep málimdedi kompanııa ókilderi.
Sondaı-aq «Qazaqstan temir joly» kompanııasynda tekserý qorytyndysy boıynsha oqıǵaǵa quqyqtyq ári óndiristik turǵyda resmı baǵa beriletinin atap ótti.
Qylmystyq-protsestik kodekstiń 201-babyna sáıkes, is boıynsha ózge aqparat ázirge jarııa etilmeıdi.
Osyǵan deıin QTJ bıylǵy jyldyń birinshi toqsanynda temirjol ótkelderinde ótken jyldyń sáıkes kezeńimen salystyrǵanda jol-kólik oqıǵalary sany 30%-ǵa tómendegenin málimdegen bolatyn.
