Tbılısıdegi sý tasqyny saldarynan 4 adam qaza tapty
BAKÝ-TBILISI. 14 mamyr. QazAqparat - Tbılısıde jeksenbige qaraǵan túni nóserli jańbyrdan bolǵan sý tasqynynyń saldarynan tórt adam qaza tapty.
Ázirbaıjandyq Trend agenttiginiń Grýzııanyń Tótenshe jaǵdaılar agenttigine silteme jasap habarlaýynsha, Tbılısıdiń oń jaq jaǵalaýynda Kýra ózeni arnasynan tasyp, Ortachal aýdanyn sý astynda qaldyrdy.
Birinshi soqqy Gorgasalı kóshesindegi barak úılerge tıdi. Munda bir áıel jáne onyń eki balasy qaza tapty. Osy kóshede, sondaı-aq egde jastaǵy bir áıel de qaıtys boldy. Budan basqa, Gorgasalı kóshesinde taǵy 8 adam zardap shekti. Olardyń barlyǵy aýrýhanaǵa jetkizildi, ómirlerine qaýip joq.
Apattyń kýási bolǵandardyń aıtýynsha, birinshi tolqynnyń bıiktigi 3 metrdi qurady, ol ózimen birge aǵashtar, qoqys, qum, tastardy alyp keldi. Sý kóshelerde turǵan kólikterdi kóterip, olardyń bir-birine soqtyǵysýyna ákelip soqtyrdy.
Tasqyn saldarynan birneshe úıdi jartylaı qırady. Qutqarýshylar barlyq turǵyndardy qaýipsiz jerge kóshirdi.
Kómekke áskerı qyzmetkerler kelip, aýyr tehnıkanyń kómegimen úıindiler men joldardy tazartty. Sebebi tasqynǵa kóshkin de qosyldy. Saǵat túngi 3-ke qaraı qatty jańbyr basylǵan soń - jaǵdaı turaqtandy.
Qutqarýshylar túni boıy jumys istedi. Olardyń jumysyn Tbılısıdiń meri Gıgı Ýgýlava úılestirip otyrdy. Qazirgi ýaqytta órt sóndirýshiler úılerdiń jertólelerinen sýdy soryp shyǵarýmen aınalysýda, qutqarý jumystary jalǵasýda. Tańǵa qaraı qaladaǵy qozǵalys qalpyna keltirildi.
G.Ýgýlavanyń málimdeýinshe, Ortachaldaǵy birqatar úılerge úlken zardap keltirildi, shyǵynnyń naqty kólemi jeksenbi kúni esepteledi. Bul rette sınoptıkter Tbılısıdegi jańbyrlar taǵy úsh kúnge sozylatyndyǵyn aıtýda.
