Tájikstan ulttyq Oriz messendjerin iske qosty

ASTANA. KAZINFORM – «Tajıktelekom» kompanııasy Oriz dep atalatyn ulttyq messendjer qosymshasyn jasap shyǵardy, dep habarlaıdy Kazinform agenttiginiń menshikti tilshisi. 

Tájikstan úkimeti janyndaǵy Baılanys qyzmetiniń málimetinshe, zamanaýı qosymsha el azamattary, sheteldegi otandastar jáne barlyq ınternet paıdalanýshy arasynda yńǵaıly, joǵary sapaly jáne qaýipsiz baılanysty qamtamasyz etý úshin jasalǵan. Onyń maqsaty – senimdi tsıfrlyq orta qurý.

– ORIZ-diń basty artyqshylyqtarynyń biri – onyń tómen ınternet jyldamdyǵyndaǵy tıimdiligi. Serverler men derekter ortalyǵy el ishinde ornalasqandyqtan, paıdalanýshylar álsiz baılanys kezinde de habarlamalar jiberip, qońyraý shalyp jáne beınekonferentsııa ótkize alady, - dep habarlaıdy agenttik. 

Ázirleýshiler keıingi jyldary álemde sheteldik platformalarǵa qol jetkizý shektelgendikten myńdaǵan tájik mıgranttary otbasylarymen baılanys ornatýda qıyndyqtarǵa tap bolǵanyn atap ótti. 

– Bul tájirıbe sheteldik jelilerge táýeldilik aqparattyq qaýipsizdik pen áleýmettik baılanysqa zııan keltirýi múmkin ekenin kórsetti. Sondyqtan ORIZ-di qurýdy Tájikstannyń tsıfrlyq egemendigine qaraı mańyzdy qadam dep sanaýǵa bolady, - dep atap ótti Baılanys qyzmeti.

Buǵan deıin habarlaǵanymyzdaı, EO messendjerlerdegi chattardy mindetti baqylaýdan bas tartty.