Tájikstan prezıdenti býldozer júrgizdi

ASTANA. QazAqparat - Tájikstanda Vahsh ózenindegi Rogýn sý elektr stantsııasynyń qurylysy resmı túrde bastaldy. Saltanatty sharaǵa el prezıdenti Emomalı Rahmon qatysty, ol býldozer róline otyryp, ózen arnasyn buryp, sý qoımasyn jasaý úshin bir jarym saǵat boıy qıyrshyq tas tókti, dep habarlady kabar.kg.

«Ata-babalarymyzdyń ıgi dástúrin jalǵaı otyryp, kórshilerimizdi eshqashan sýsyz qaldyrmaıtynymyzdy tolyq jaýapkershilikpen málimdeımin», - dedi tájik kóshbasshysy saltanatty jıynda.

Sonymen birge, Tájikstan basshysy nysannyń ózen saǵasy elderindegi paıdalanatyn jerlerdi sýlandyrýdy da júzege asyratynyn habarlady. Bizge belgili bolǵandaı, Ózbekstan Rogýn GES qurylysyna túbegeıli qarsy, olar seısmıkalyq qaýipti aımaqtaǵy toǵannyń Ámýdarııa saǵasyndaǵy halyqqa qaýipti ekenin jáne sý qoımasy qurylysynan egin sýarýǵa sý jetpeı qalatynyn aıtýda. 1 shilde kúni Tájikstan úkimeti ıtalııalyq Salini Impregilo S.p.A. kompanııasymen quny 3,9 mlrd. dollar bolatyn shektelmeli kelisimge qol qoıdy. Alǵashqy eki týrbınany iske qosý 2018 jyldyń ekinshi jartysyna josparlanǵan. Toǵan qurylysy 1987 jyly bastalǵan edi, alaıda KSRO ydyraýymen joba toqtap qalǵan. Tájikstan bıligi tabandy túrde sý qoımasyn salyp bitirýge tyrysýda. Eger joba júzege assa, álemdegi eń bıik (335 m) toǵan bolady jáne onyń iske qosylýy eldegi energııanyń jetispeýshiligi máselesin sheshe alady.