Taıvanda prezıdent saılaýy ótip jatyr

Taıvanda prezıdent jáne parlament saılaýy ótip jatyr. El prezıdenttigine negizgi úmitkerler - Demokratııalyq progressıvti partııa atynan qatysqan qazirgi vıtse-prezıdent Laı Tsınde men konservatıvtik partııa atynan Gomından Hoý ıÝı. Kazinform bul týraly CNN-ge silteme jasap habarlaıdy. 

Negizgi eki úmitkerden bólek, Taıvan prezıdenttigine úshinshi úmitker bar, ol - Ke Venchje.

Boljam boıynsha, daýys berýge 19,5 mln adam qatysady. Bıýlletenderdi qolmen sanaǵannan keıin alǵashqy nátıje senbi keshke habarlanýy kerek.

Parlamentte 113 oryn bar. Bir mandatty okrýg depýtattaryna onyń 73-i bólingen, 34 depýtat jalpyulttyq saılaý arqyly tańdalsa, 6 oryn araldyń baıyrǵy turǵyndaryna arnalǵan.

Parlamenttegi orynǵa Taıvannyń 16 saıası partııasynyń ókilderi talasyp jatyr. Kóp daýys jınaǵan úmitker prezıdent saılaýynyń jeńimpazy atanady, ekinshi týr bolmaıdy. Taıvan prezıdenti tórt jyl merzimge saılanady jáne tek bir ret qana qaıta saılaýǵa túsý múmkindigi bar.