Táýelsizdikke 30 jyl: Atbasarda dárigerler baspanaly boldy

KÓKShETAÝ. QazAqparat - Aqmola oblysynyń Atbasar qalasynda dárigerlerge arnalǵan 25 páterli turǵyn úıdiń qurylysy aıaqtaldy, dep habarlaıdy QazAqparat tilshisi.

Oblystyq ishki saıasat basqarmasynyń málimetinshe, páter kiltin tapsyrý rásimine Aqmola oblysynyń ákimi Ermek Marjyqpaev qatysyp, densaýlyq saqtaý júıesiniń qyzmetkerlerine qajyrly eńbegi úshin alǵys bildirdi.

Aımaq basshysynyń aıtýynsha, ákimdik tarapynan qabyldanyp jatqan sharalardyń arqasynda sońǵy eki jyl ishinde dáriger kadrlaryna degen qajettilikti bir jarym esege qysqartýǵa múmkindik týdy. 2021 jyly oblysqa 72 jas dáriger jáne 109 orta medıtsına qyzmetkeri keldi. Oblysta barlyǵy 7 myńǵa jýyq medıtsına qyzmetkeri eńbek etedi.

Jyl saıyn densaýlyq saqtaý nysandarnyń materıaldyq-tehnıkalyq jaraqtandyrylýy jaqsarýda. Toǵyz medıtsınalyq mekemege kúrdeli jóndeý jumystary júrgizilip, taǵy 7 nysannyń kúrdeli jóndeý jumystary aıaqtalýda. Sonymen birge, 6 emhana men dárigerlik ambýlatorııa paıdalanýǵa berildi, sala qyzmetkerlerin bekitý boıynsha turǵyn úı máselesi sheshilýde.

Aıta keteıik, qan ortalyǵy ǵımaratyn aýdan ortalyǵyndaǵy turǵyn úı retinde jóndeý boıynsha joba osy jyldyń jazynda bastaldy. Josparlanǵan jumystar merziminde aıaqtaldy.

«Biz úshin bul úlken oqıǵa, bul bizdiń aýdan tarıhynda alǵash ret bolyp otyr. Osynyń arqasynda qalamyzǵa qajetti mamandardy tartý múmkin boldy, búgin birden 19 dáriger páter kiltin aldy, taǵy 5 - rezervtik. Árıne, bul jas dárigerler úshin úlken demeý. Táýelsizdiktiń 30 jyldyq mereıtoıyna, sonymen qatar jańa jyl qarsańynda tamasha syı boldy»,-dep atap ótti Atbasar kópsalaly aýdanaralyq aýrýhanasynyń bas dárigeri Zaryqqan Shaýbaev.

Eske sala ketsek, oblys boıynsha Kókshetaý qalasynda medıtsına qyzmetkerleri úshin 40 páterli úı salyndy, Egindikól jáne Jaqsy aýdandarynda ǵımarattar qaıta beıindeldi.