Tasqyn sýdyń saldarynan bolǵan mal shyǵynynyń orny toldy - BQO
ORAL. 3 mamyr. QazAqparat /Eljan Eraly/ - BQO-da tasqyn sýdyń saldarynan bolǵan mal shyǵynynyń orny toldy.
Jalpy, óńirde tabıǵı apattan aýyl sharýashylyǵy salasyna 126,7 mln. teńge shyǵyn kelgen bolatyn. Oblystyq aýyl sharýashylyǵy basqarmasynyń bastyǵy Marat Ońǵarbekovtiń sózine qaraǵanda, turǵyndardyń sýǵa ketken malynyń ornyn halyq ózi toltyryp berdi. Atap aıtqanda, oblys boıynsha 79 bas iri qara, 460 qoı-eshki, 102 bas shoshqa shyǵyn bolǵan. Onyń ishinde Aqjaıyq aýdanynda 58 sıyr, 25 qoı-eshki, Zelenov aýdanynda 9 sıyr, 206 usaq jandyq, 53 shoshqa, Tasqala aýdanynda 5 iri qara, 189 qoı-eshki, 2 shoshqa, Shyńǵyrlaý aýdanynda 1 sıyr, 26 qoı-eshki, 1 jylqy, Oral qalasynda 6 sıyr, 14 qoı-eshki, 47 bas shoshqa sýǵa ketken. Mal shyǵyny qarjylaı eseptegende 13,4 mln. teńgeni quraıdy. Biraq bul shyǵynnyń bárin oblys óz resýrstary esebinen, halyq asar jasap, ornyn túgel toltyrdy. Máselen, Qaztalov pen Jánibek aýdany árqaısysy 10 bas, Jańaqala men Bókeı ordasy aýdany - árqaısysy 5 bas sıyr malyn Aqjaıyq aýdanyndaǵy zardap shekken jurtqa taratty. Al qaratóbelikter - 50, syrymdyqtar - 56, Jańaqala aýdany - 100 bas qoı-eshkini Zelenov aýdanynda japa shekken turǵyndardyń qorasyna kirgizdi. Tasqala aýdanynda tasqynnan maly opat bolǵan halyqty Bókeı ordasy aýdany - 120, Jánibek 20 qoımen jarylqady. Shyńǵyrlaý aýdany óz shyǵynyn ózi japsa, Oral qalasyna Terekti aýdany 6 sıyr, 8 qoı, Bórli aýdany 29 shoshqa jetkizgen.
Oblystyń egin, baý-baqsha sharýashylyqtary tasqyn sýdyń kesirinen 113,3 mln. teńge shyǵyn tartqan. Zelenov aýdanynyń ózinde 1887 tonna tuqymdyq bıdaı sý astynda qalyp búlingen. Buǵan qosa 1 myń tonna tuqymdyq pııaz, 50 myń túp óskin, 8 tonna kartop, 5 tonna sábiz sýǵa ketipti. Astyq saqtaıtyn bir qoıma da búlindi. Oral qalasynda jalpy aýmaǵy 1 myń sharshy metr bolatyn 4 jylyjaı sýǵa ketti. Bul shyǵyndardyń ornyn toltyrýǵa eshqandaı qarajat kózi qarastyrylmasa da, tabıǵat apatynan tuqymdyq qory zardap shekken sharýashylyqtarǵa, sonyń ishinde eń kóp shyǵyn tartqan «Karkýla» sııaqty qojalyqtarǵa jeńildikti nesıe berý oılastyrylýda.
