Qazaqstanda densaýlyq saqtaý salasynda jasandy ıntellektini engizý tártibi ázirlendi
ASTANA. KAZINFORM - Qazaqstan Densaýlyq saqtaý mınıstrligi jasandy ıntellekt (JI) tehnologııalaryn qoldana otyryp medıtsınalyq qyzmet kórsetý tártibin retteıtin normatıvtik quqyqtyq akt ázirledi.
Atalǵan mindet Memleket basshysynyń ótken jyldyń qyrkúıek aıyndaǵy Qazaqstan halqyna Joldaýynda berilgen tapsyrmasyn oryndaý sheńberinde júzege asyrylyp otyr. Onda JI tehnologııalaryn qoldaný arqyly medıtsınalyq qyzmetterdiń sapasy men kólemin monıtorıngileýdiń jańa júıesin qalyptastyrý mindeti qoıylǵan.
Qujat densaýlyq saqtaý júıesine JI engizýdiń ashyq, qaýipsiz jáne ǵylymı negizdelgen modelin qalyptastyrýǵa baǵyttalǵan. Onyń negizinde sheshimderdiń klınıkalyq jáne ekonomıkalyq tıimdiligin mindetti túrde baǵalaý kózdelgen. Bul olardyń praktıkalyq mańyzdylyǵy men keıingi aýqymda engizý kezindegi turaqtylyǵyn qamtamasyz etedi.
Tártip JI júıelerin engizý men paıdalanýǵa biryńǵaı tásilderdi belgileıdi. Ol medıtsınalyq buıymdarǵa jatatyn baǵdarlamalyq qamtamasyz etýdi qosa alǵanda, klınıkalyq sheshimderdi de, sondaı-aq basqarýshylyq jáne ákimshilik protsesterde qoldanylatyn klınıkalyq emes quraldardy da qamtıdy.
Sala deńgeıinde alǵash ret JI tehnologııalaryn engizýdiń kezeń-kezeńimen júzege asyrylatyn algorıtmi aıqyndaldy: ótinimderdi berýden jáne tehnologııalyq daıyndyqty baǵalaýdan bastap pılottyq aprobatsııadan ótkizýge deıin, qajet bolǵan jaǵdaıda — tirkeý rásimderinen ótý, senimdi sheshimder tizbesine engizý jáne keıinnen aýqymdaý.
Qujatta sheshimderdiń tıimdiligi men qaýipsizdigin dáleldeıtin baza qalyptastyrýǵa erekshe nazar aýdarylǵan. Bıoetıkalyq saraptama, klınıkalyq valıdatsııalaý jáne densaýlyq saqtaý tehnologııalaryn baǵalaý tetikteri kózdelgen. Pılottyq jobalardyń sheńberinde algorıtmderdiń dáldigi men sezimtaldyǵy, olardyń klınıkalyq sheshimderge yqpaly jáne medıtsına qyzmetkerlerine túsetin júktemege áseri sııaqty negizgi tıimdilik kórsetkishteri baǵalanatyn bolady.
Sondaı-aq, qujatta senimdi jasandy ıntellekt júıeleriniń tizbesin qalyptastyrý, olardyń qaýipsizdigi men tıimdiligin tirkeýden keıingi monıtorıngteý júıesin engizý máseleleri jeke qarastyrylǵan.
Joba aqparattyq qaýipsizdik pen derbes derekterdi qorǵaý talaptaryn kúsheıtýdi, sondaı-aq ázirleýshilerden bastap medıtsınalyq uıymdar men paıdalanýshylarǵa deıingi barlyq qatysýshynyń jaýapkershiligin aıqyndaýdy kózdeıdi.
Densaýlyq saqtaý mınıstrliginiń málimetinshe buıryqty bekitý teńgerimdi retteýshi ortany qalyptastyrýǵa, jasandy ıntellekt tehnologııalaryn qaýipsiz ári baqylanatyn túrde engizýdi qamtamasyz etýge, sondaı-aq densaýlyq saqtaý júıesin tsıfrlyq transformatsııalaýdy jedeldetýge múmkindik beredi.
Aıta keteıik, Qazaqstan statıstıkamen jumys isteýge arnalǵan AI-kómekshini iske qosty.
