Tasqyn sý basqan Qulsarynyń turǵyndaryna 62 úı berildi
QULSARY. KAZINFORM – Atyraý oblysyndaǵy tasqyn sý basqan Qulsary qalasynyń turǵyndaryna 62 úı berildi.
Tasqyn sýdan zardap shekken turǵyndar úshin Qulsary qalasynda jańa shaǵyn aýdan boı kóterdi. Shaǵyn aýdandy «Bolashaq» dep ataý uıǵarylǵan. Munda 100 turǵyn úı salýǵa jergilikti 8 merdiger kompanııa tartyldy. Turǵyn úı qurylysyna qazaqstandyq materıaldar qoldanylǵan.
«Qazaqstan halqyna» qorynyń baspasóz qyzmetinen málim etkendeı, Qulsary qalasynda 80 turǵyn úıdiń qurylysyn júrgizýge 2 mlrd 640 mln teńge bólingen. Munda 1 úıdi salýǵa jumsalǵan qarjy 31 mln 975 myń teńge boldy.
Tıptik úlgidegi jańa úılerdiń árqaısysynyń aýdany – 100 sharshy metr. Turǵyn úılerdiń avtorlyq dızaınyn «ETALON PROJECT GROUP» JShS daıyndaǵan. Bul seriktestik dızaınnyń saqtalýyna baqylaý júrgizdi. Al tehnıkalyq qadaǵalaýdy «ZAF-Stroıservıs» JShS júzege asyrǵan.
Atyraý oblystyq qurylys basqarmasynyń basshysy Nurbergen Qusaıynovtyń málimetinshe, maýsymda 100 úı salyna bastalǵan. Onyń ishinde 62 úıdiń qurylysy tolyq aıaqtalǵan.
«Jańa úılerge sý, gaz, elektr jelisi tartyldy. Ár úıdiń qurylysyn júrgizýge 10 sotyq jer telimi bólindi. Endi 58 úıdiń qurylysy qyrkúıektiń sońyna deıin aıaqtalady», - dedi Nurbergen Qusaıynov.
Turǵyndar qýanyshymen bólisýge kelgen oblys ákimi Serik Shápkenovtiń aıtýynsha, Qulsaryda jańa turǵyn úılermen birge 2 myń oryndyq Binom mektebin, 300 oryndyq balabaqsha nysanyn salý josparlanyp otyr. Sondaı-aq shaǵyn alleıalar salynady.
«Shaǵyn aýdannyń aty «Bolashaq» atalǵan soń osynda turatyn otbasynda balalardyń keleshegi jarqyn bolǵanyn qalaımyz. Aldaǵy jyly mektep, balabaqshamen birge dene shynyqtyrý-saýyqtyrý ortalyǵy salynady», - dedi Serik Shápkenov.
Eske sala ketelik, budan buryn sý basqan Qulsary qalasynda 100 úıdiń qurylysy qalaı júrip jatqanyn jazǵan edik.
