Tasymaldaýshylarǵa jańa talap engiziledi
ASTANA. KAZINFORM – Endigi jerde qazaqstandyq tasymaldaýshylar úshin sheteldik ruqsat blankilerin alý tártibi ózgeredi. Jańa talaptarǵa sáıkes, ashyqtyq máselesi rettelip, naryqta tasymaldanǵan ónimderdiń baǵasy arzandaýy múmkin.
Ortalyq kommýnıkatsııalar qyzmetinde ótken brıfıngte Kólik mınıstrligi Avtomobıl kóligi jáne kóliktik baqylaý komıtetiniń tóraǵasy Altaı Áli jańashyldyqtyń jaı-japsaryn túsindirip berdi.
– Buryndary tasymaldaýshylarǵa ruqsat blankilerin qoldanýǵa 100 kún ýaqyt beriletin. Merzimi aıaqtalar kezde olar qoldanylmaǵan blankini sata bastaıdy. Ruqsat qaǵazy tap-taza, ıaǵnı, ózge tasymaldaýshy qoldana alady. Osylaısha, muny kásipke aınaldyrǵan deldaldar paıda bola bastady. Endigi jerde tasymaldaýshyǵa shetelge tasymaldaıtyn júgi daıyn bolǵan kezde ǵana ruqsat qaǵazy beriledi. Burynǵydaı taza kúıinde emes. Júk kóliktiń nómiri, ózge de málimetter jazylady. Osylaısha, ekinshi tarapqa satýdyń joly kesiledi. Qala berdi, kedendik beketterden «Búrkit» júıesi arqyly júk kóliginiń shekaradan ótkeni týraly aqparat alamyz. Ereje buzǵandar 6 aı boıy tasymaldaýshy quqyǵynan aıyrylady. Budan keıin taǵy tártip buzatyn bolsa ómir baqı shetelge júk tasymaldaı almaıdy, – dedi Altaı Áli.
Jańa erejege sáıkes, resimdelgen avtokóliktiń QR aýmaǵynan shyǵýy úshin týra 30 kún ýaqyt beriledi. Qazaqstanǵa oralǵannan keıin 30 kún ishinde qujattardy kóliktik baqylaý ınspektsııasyna tapsyrý qajet.
Aıtpaqshy, ruqsat blankilerin alý tártibiniń jeńildeýi júk tasymaldaý ýaqytyn azaıtyp, ózge de kedergilerdi joıyp, sáıkesinshe tasymaldanǵan ónimderdiń baǵasynyń arzandaýyna áserin tıgizýi múmkin.
Aıta keteıik, Qazaqstan 42 elmen halyqaralyq tasymaldaýdy júzege asyrady. Ár elde barlyq ereje kórsetilgen úkimetaralyq kelisim bar. 2022 jyly 155 myń blanki alynyp, onyń 45%-y ǵana paıdalanylǵan. 2023 jyly 270 myń blanki (67%) qoldanylǵan.
