Tashkentte robot kómegimen alǵashqy endoprotezdeý otasy jasaldy

TAShKENT. KAZINFORM – Ózbekstan astanasynda robot kómegimen tize jáne jambas býyndaryn endoprotezdeý boıynsha alǵashqy otalar sátti ótti. Bul jetistik Ózbekstandaǵy Qazaqstan medıtsınasy kúnderi aıasynda júzege asty.

Operatsııalardy travmatolog-ortoped, akademık Batpenov atyndaǵy UTOǴO endoprotezdeý bólimshesiniń meńgerýshisi Tımýr Baıdalın oryndady. Ol eki patsıentke tize jáne jambas býyndarynyń endoprotezderin ornatty.

– MAKO júıesiniń basty artyqshylyǵy – hırýrgtyń tájirıbesi men robottyń joǵary dáldigin ushtastyrý múmkindigi. Bul endoprotezdeýdiń jańa sapa deńgeıi, – dedi Tımýr Baıdalın.

Robottandyrylǵan tehnologııa otany aldyn ala modeldeýge, ár patsıenttiń anatomııalyq erekshelikterin dál eskerýge jáne ımplantty minsiz ornatýǵa múmkindik beredi. Bul naýqastar úshin asqynýdyń azaıýyn, ońaltýdyń jedeldeýin jáne uzaq belsendi ómir súrýdi qamtamasyz etedi.

Ózbek dárigerleri otaǵa qatysyp, qazaqstandyq áriptesteriniń jetekshiligimen MAKO júıesinde jumys isteý tájirıbesin aldy.

RMǴPTO eresekter ortopedııasy bólimshesiniń meńgerýshisi Odıl Valıev bul oqıǵany ortopedııa salasyndaǵy mańyzdy jetistik dep atap ótti.

– Biz bul júıeni kópten kúttik. Búgin ony is júzinde kórip, aıyrmashylyǵyn sezindik. Bul bizdiń sala úshin úlken oqıǵa, qazaqstandyq áriptesterimizge alǵys bildiremiz, – dedi ol.

Osylaısha, Tashkentte ótken birlesken ota ortopedııa men travmatologııa salasyndaǵy yntymaqtastyqtyń jańa kezeńin bastap berdi.

Aıta keteıik, SQO-da bıyl 200 mln teńgege turǵyndarǵa qymbat ota jasalǵan.