Tarazda 43 ret jyldamdyqty arttyrǵan júrgizýshi ustaldy

TARAZ. KAZINFORM — Taraz qalasynda «Boryshker» jedel-profılaktıkalyq is-sharasy barysynda jaýapkershilikten qashyp júrgen «Mitsubishi Pajero» markaly avtokóliktiń júrgizýshisi ustaldy. Bul týraly Jambyl oblysynyń polıtsııa departamenti habarlady.

Tekserý nátıjesinde júrgizýshiniń 43 ákimshilik quqyq buzýshylyq jasaǵany, olardyń barlyǵy da jyldamdyqty belgilengen normadan asyrý deregi ekeni belgili boldy. Ol jol qozǵalysy erejesin elemeı, kólik júrgizýshileri men jolaýshylardyń ómirine qaýip tóndirgen. Quqyq buzýshynyń avtokóligi aıyp turaǵyna qoıyldy.

Jalpy, jyl basynan beri «Boryshker» is-sharasy aıasynda 5 353 avtokólik aıyp turaǵyna jetkizilgen.

— Polıtsııa departamenti barlyq júrgizýshilerdi jol qozǵalysy erejelerin qatań saqtaýǵa, ásirese jyldamdyq rejımin buzbaýǵa shaqyrady. Jyldamdyqty asyrý — jol-kólik oqıǵalaryna ákeletin negizgi sebepterdiń biri, — delingen aqparatta.

Eske salaıyq, Tarazda turǵyndardyń mazasyn alǵan polıgrafııa ár talap qoıýshyǵa 500 myń teńgeden ótemaqy tóleıdi.