Tarazda aptap ystyqta basynan kún ótkender dárigerge shaǵymdandy
Jambyl oblystyq jedel medıtsınalyq járdem stansasynyń málimetinshe, 24-30 mamyr aralyǵynda stansaǵa túsken qońyraý sany – 9995, onyń ishinde basynan kún ótý boıynsha 2 jaǵdaı tirkelgen.
Al, 30 mamyrdan 6 maýsymǵa deıin 10 235 qońyraý tirkelse, onyń ishinde ekeýi aptap ystyqtan aýyryp jedel járdem shaqyrǵan.
Dárigerler ystyq aýa raıynda saǵat 11.00-den 16.00-ge deıin tikeleı kún sáýlesiniń astynda júrmeýge keńes beredi.
Ashyq tústi tabıǵı matadan jasalǵan jeńil kıim kıip, bas kıimdi umytpaý kerek.
Sýsyzdandyrýǵa tez ákeletin qantty gazdalǵan sýsyndardan, alkogolden jáne kofeınnen aýlaq bolý úshin kóbirek sý ishý kerek.
Mamandar, ásirese, sozylmaly aýrýy bar adamdardy, balalardy, júkti jáne qart adamdardy barynsha abaı bolýǵa shaqyrady.
Eger dene temperatýrasy men qan qysymynyń joǵarylaýy, bas aýrýy, álsizdik jáne júrek aınýy sekildi kún soqqysynyń belgileri bolsa, naýqasty dereý salqyn bólmege aparý kerek.
Moıyn, qoltyq, alaqan jáne shap aımaǵynda temperatýrany tómendetý úshin dymqyl, salqyn maılyqtardy qoldanǵan jón.
Sondaı-aq, naýqasqa sý balansyn qalpyna keltirý úshin ár 2-3 saǵat saıyn salqyn sý berý kerek.
Esin joǵaltý jáne bas aınalý jaǵdaıynda jedel járdem shaqyrý qajet.
Buǵan deıin Jambyl aýrýhanalaryna 20 reanımobıl men 20 sanıtarlyq avtokólik alynatynyn jazǵan bolatynbyz.