Tarazda 10 jasar bala aýyr qylmysty ashýǵa kómektesti
TARAZ. KAZINFORM – Eki keshtiń ortasynda Taraz qalalyq polıtsııa basqarmasynyń kezekshi bólimine qońyraý shalǵan áıel úıiniń janynda belgisiz adam kúıeýine pyshaq jaraqatyn salǵanyn habarlady.
Jedel áreket etýdiń arqasynda jaralanǵan er adam qalalyq aýrýhananyń jansaqtaý bólimine jetkizildi. Artynsha densaýlyqqa qasaqana aýyr zııan keltirý babymen sotqa deıingi tergeý bastaldy.
Oqıǵa ornyna jedel jetken polıtsııa qyzmetkerleri qylmystyń mán-jaıyn anyqtaý barysynda jaqyn jerde oınap júrgen 10 jasar bala qylmystyń kezdeısoq kýágeri bolǵanyn bilgen. Bir qýanyshtysy, oıyn balasy bolsa da ol bárin esine saqtap qalǵan eken. Osylaısha 10 jasar bala polıtseılerge kúdiktiniń kıimi, kelbeti, qaıda qashqany týraly mańyzdy aqparatty aıtqan. Oqýshynyń qyraǵylyǵynyń arqasynda polıtsııa qyzmetkerleri kúdiktini izin sýytpaı ustady.
Polıtsııa qyzmetkerlerine aýyr qylmysty ashýǵa kómektesken 10 jasar balanyń bul erligi eleýsiz qalmady. Taraz qalasy polıtsııa basqarmasynyń basshylyǵymen oqýshyǵa aýyr qylmysty ashýǵa kómekteskeni úshin alǵys hat tabys etildi.
