Talǵardaǵy qylmys: urlanǵan qyzdyń densaýlyǵy qalaı

ASTANA. KAZINFORM – Talǵardaǵy oqıǵa kezinde jaraqat alǵan kishkentaı qyzǵa ota jasalyp, tili segiz tusynan tigildi. Bul týraly advokat Gaýhar Sarıeva Instagram paraqshasynda habarlady.

«Balaǵa operatsııa jasaldy, dárigerler tiline segiz tigis saldy. Qylmysker búldirshinmen birge kólik apatyna ushyraǵanda, jaraqattar sol kezde bolǵan. Ol qyzǵa qol kótergen joq. Qyzdyń tiri qalǵany – úlken baqyt, ol qandaıda bir tylsymnyń kúshimen aman qaldy», – dep jazdy Sarıeva.

Advokattyń aıtýynsha, búldirshinniń anasy – medbıke. Qıyn sátte ol kórshisiniń úıinde bolyp, onkologııalyq naýqasqa dári tamshylatyp jatqan.

«Ol úıde bolmaǵanyna shúkir. Eger qylmysker ony sol jerde kórgende, ne bolaryn elestetýdiń ózi qıyn», – dedi Sarıeva.

Buǵan deıin áleýmettik jelilerde TKQO qyzmetkeri er adamdy atyp, onyń kishkentaı qyzyn urlap ketkeni týraly aqparat taraǵan edi. Arnaıy jasaq der kezinde operatsııa júrgizip, balany aman-esen qutqaryp, anasymen qaýyshtyrdy. Kúdikti ustaldy.

Tergeý málimetinshe, kúdikti men jábirlenýshiniń anasy buryn jaqyn qarym-qatynasta bolǵan. Janjal kezinde ol áıeldiń baýyryna myltyqpen oq atyp, er adam alǵan jaraqatynan oqıǵa ornynda kóz jumǵan. Osydan keıin qaskóı qyzdy urlap, jasyrynbaq boldy.

Qazirgi ýaqytta kúdiktige qatysty kisi óltirý jáne bala urlaý derekteri boıynsha qylmystyq ister qozǵaldy.