Talǵardaǵy qaraly úıdiń órtenýi - Bas prokýratýra málimdeme jasady

ALMATY. KAZINFORM - Almaty oblysynda janjal kezinde qaıtys bolǵan Sherzat Bolattyń úıi búgin túnde órtendi. Bul jaǵdaıǵa baılanysty Bas prokýratýra málimdeme jasady.

Bas prokýratýra málimetine sáıkes, qylmystyq is Qazaqstan Respýblıkasy Bas prokýrorynyń baqylaýyna alyndy. Sondaı-aq qylmysty ashý úshin vedomstvoaralyq jedel-tergeý toby quryldy.

- Talǵarda jasóspirimdi óltirý isi boıynsha jábirlenýshilerdiń úıin órteý faktisine qatysty 2024 jylǵy 12 qazanda Bas prokýratýranyń basshylyǵymen qylmysty ashý úshin vedomstvoaralyq jedel-tergeý toby quryldy. Kinálilerdi áshkereleý úshin barlyq sharalar qabyldanatyn bolady. Qylmystyq is Qazaqstan Respýblıkasy Bas prokýrorynyń baqylaýyna alyndy, - dep habarlady Bas prokýratýranyń baspasóz qyzmeti.

Eske salaıyq, saǵat 00:50-de úıdi jalyn sharpyǵan. Órt saǵat 01:43-de tolyǵymen joıyldy. 

Buǵan deıin 4 qazan kúni Talǵar qalasyndaǵy tóbelesten jasóspirim qaıtys bolǵanyn jazǵanbyz. 

Odan keıin Sherzattyń týǵan-týystary men Talǵar turǵyndary ashyq tergeý bolýyn talap etip, narazylyqqa shyqqan bolatyn.