Taılandta sý tasqynynan pilder qyryldy

ASTANA. KAZINFORM – Taılandta pilderdi sýyqtyrý qoryǵyndaǵy eki pil sý tasqynynan qyryldy, dep habarlaıdy Euronews. 

Tabıǵı apat pilder mekendeıtin ulttyq parkke aıtarlyqtaı zııan keltirdi. Buǵan deıin Taılandta «ıAgı» taıfýny soqty. Tabıǵı apatqa baılanysty qoryqty evakýatsııalaý týra keldi. Júzden astam pil qutqaryldy, biraq ekeýi kúshti sý tasqyny kezinde batyp ketti. Janýarlardyń deneleri tasyp jatqan ózenniń tómengi aǵysynan tabylǵan. Taǵy bir pil joǵalyp ketti.

Qoryqtyń ınfraqurylymy aıtarlyqtaı zardap shekti. Saıabaq basshylyǵy el bıligine júginip, kómek surady.

Buǵan deıin Zımbabve bıligi qurǵaqshylyqtan qutylý úshin 200 pildi óltirýdi josparlap otyrǵany týraly jazǵan bolatynbyz.

Zımbabvede barlyǵy 100 myńǵa jýyq pil mekendeıdi. Bul el osy janýarlardyń sany boıynsha Botsvanadan keıingi ekinshi orynda tur. Zımbabvede pilder buǵan deıin 1988 jyly atylǵan da aıta ketken jón. 

Namıbııa sońǵy onjyldyqtaǵy eń aýyr qurǵaqshylyq saldarynan 700 jabaıy janýardyń, onyń ishinde pilder men sýsıyr joıylatynyn málimdegen. Namıbııanyń qorshaǵan ortany qorǵaý mınıstrligi 160-qa jýyq janýardyń óltirilgenin habarlady.

Eske sala ketsek, Qazaqstanda kıik popýlıatsııasyn retteý 2023 jyldyń qazanynda bastalyp, 2024 jyldyń 10 aqpanynda aıaqtaldy. Memleket basshysy Qasym-Jomart Toqaev Qostanaı oblysynyń turǵyndarymen kezdesýinde qazaq dalasynyń sımvoly sanalatyn kıikter popýlıatsııasyn joıýǵa tyıym salatynyn málimdedi. Elimizdiń aýmaǵynda kıik aýlaý ýaqytsha toqtady.