Aýstrııada balalar taǵamyna egeýquıryq ýyn qosqan er adam ustaldy
ASTANA. KAZINFORM — Ustaý operatsııasy Zaltsbýrg federaldyq jerinde ótti, dep habarlaıdy DW.
Basylym málimetinshe, 39 jastaǵy er adam jalǵyz áreket etken. Onyń maqsaty aqsha bolǵan: ol germanııalyq HiPP kompanııasynan 2 mıllıon eýro kóleminde krıptovalıýta talap etken. Qylmysker sýpermarketterden balalar taǵamynyń qutylaryn satyp alyp, ishine ý qosyp, qaıtadan sórelerge qoıǵan.
Tergeý 38 kúnge sozyldy. Tergeýshiler Aýstrııamen qatar Chehııa jáne Slovakııada da jumys júrgizgen. Ý qosylǵan bes banka tárkilendi — olar túbindegi aq-qyzyl japsyrma arqyly anyqtalǵan. Qazirgi ýaqytta Aýstrııada altynshy ýlanǵan quty izdestirilip jatyr.
Qylmyskerdi sýpermarketterdegi beınebaqylaý kameralarynyń jazbalary jáne onyń HiPP kompanııasyna jibergen elektrondy haty arqyly anyqtaǵan. Qazir prokýratýra ustalǵan adamǵa qandaı aıyp taǵylatynyn qarastyryp jatyr — densaýlyqqa aýyr zııan keltirýge árekettený me, álde adam óltirýge oqtalý ma.
Aıta ketelik Aýstrııada Hipp balalar taǵamynan egeýquıryq ýy tabylǵany týraly jazǵan edik. Sondaı-aq Sanıtarııalyq-epıdemıologııalyq baqylaý komıteti HiPP balalar taǵamynan egeýquıryq ýy tabylǵany týraly aqparatty teksergen edi.
