Sýreti teris basylǵan poshta markasy aýktsıonda 2 mln dollarǵa satyldy

Ótken aptada Nıý-Iorktegi aýktsıonda jańa rekord ornady: «Tóńkerilgen Djennı» poshta markasy eki mıllıon dollarǵa satyldy.

Bul jalpy álemdik fılatelııa úshin rekord emes, eń qymbat marka – British Guiana toǵyz jyl buryn 9,5 mln dollarǵa satylǵan bolatyn. Biraq bul – AQSh-ta shyǵarylǵan markanyń rekordy. Kazinform bul týraly VVS-ge silteme jasap habarlaıdy.

«Tóńkerilgen Djennı» dep atalatyn tanymal marka 1918 jyly shyqty. Onyń nomınaldyq quny 24 tsent edi. Ereksheligi – markada beınelengen «Djennı» dep atalatyn Curtiss JN-4 poshta ushaǵy qatelesip teris basylyp ketken.

Poshta qyzmetkerleri qatelikti dereý baıqaǵanymen, 100 marka aınalymǵa ketip úlgerdi. Kollektsııa jınaýshy-fılatelıster osy júz markadan qalǵany úshin iri kólemdi aqsha tóleýge daıyn.

Tanymal kollektsııa jınaýshy, 76 jastaǵy Charlz Hek Robert A Siegel Auction Galleries aýktsıonynda markany alý úshin eki mıllıon dollar tóledi.

Hekte buǵan deıin eki «Tóńkerilgen Djennı» bar edi. Birinshisin ǵasyr basynda 300 myń dollarǵa satyp alsa, ekinshisin 2007 jyly mıllıonǵa jýyq qarjy tólep ıelendi.

Bul markaǵa kópten beri fılatelısterdiń qoly jetpeı júrdi. Ony shyǵarylǵannan keıin syrt kóz múldem kórmegen, sebebi ıesi de, onyń urpaqtary da bank seıfinde saqtaǵan. Sondyqtan onyń baǵasy joǵary boldy.

2018 jyly ol alǵash ret aýktsıonda satyldy.

100 markanyń ishindegi 49-nómirlisi 105 jyl jaryq túspegendikten jaqsy saqtalǵan. «Túsi – qanyq, al qaǵazy – aq», - delingen saýdaǵa shyǵarylǵan marka sıpattamasynda.

Charlz Hek Washington Post gazetine bergen suhbatynda baǵaly markany ary qaraı da jaryqtan qorǵaıtynyn aıtty.