Almatyda sýǵa túsýge tyıym salynǵan sý aıdyndary ataldy
ALMATY. KAZINFORM — Almatyda 44 sý aıdyny bar, olardyń 9-y shomylýǵa qaýipti.
QR TJM «Barys» Respýblıkalyq jedel-qutqarý jasaǵynyń súńgýir-qutqarý bóliminiń basshysy Andreı Bybchenkonyń aıtýynsha, bul oryndar sý tereńdigine, aǵystyń kúshtiligine jáne arnaýly jabdyqtalǵan orynnyń bolmaýyna baılanysty qaýipti dep tanylǵan. Atap aıtqanda:
— «Shańyraq» yqsham aýdanyndaǵy Úlken Almaty ózeni — Alataý aýdany;
— «Darhan» yqsham aýdanyndaǵy Úlken Almaty ózeni — Alataý aýdany;
— «Qarasý» yqsham aýdanyndaǵy toǵan — Alataý aýdany;
— Úlken Almaty ózeni (Ál-Farabı — Naýaı) — Bostandyq aýdany;
— «Kemel» yqsham aýdanyndaǵy Pervomaı toǵandary — Jetisý aýdany;
— Kishi Almaty ózeni (Býtakovkaǵa burylys) — Medeý aýdany;
— ıÝnnat kóli — Medeý aýdany;
— Áýejaı kóli — Túrksib aýdany;
— Qarasý ózeniniń ıirimderi (Shestýha) — Túrksib aýdany.
— Qazir sý aıdyndarynyń eshqaısysy tolyq jumys istep turǵan joq. Saıranda sý joq, Úlken Almaty kanalynda qaıta jańǵyrtýǵa daıyndyq jumysy júrip jatyr, — dedi Andreı Bybchenko.
Qutqarýshy adamdar jıi jiberetin qatelikke de nazar aýdarady. Onyń sózinshe, kópshilik eskertý belgisin elemeıdi, taý ózeniniń aǵysyna qaramaıdy, jabdyqtalmaǵan jerde baryp sýǵa túsedi. Mańaıda qutqarýshylardyń bolmaýy, taýda aýa raıynyń kúrt ózgerýi de turǵyndarǵa qaýip týdyrady. Sondyqtan ol ruqsat etilgen oryndardyń ózinde qaýipsizdik erejesin saqtap, sýǵa túsýge arnalmaǵan jerlerge jolamaý kerektigin atap ótti.
Eske salaıyq, buǵan deıin Túrkistan oblysynda nóser saldarynan kópirlerdi sý shaıyp, 81 adam evakýatsııalandy.
