«Sýǵa qatysty shý» - baspasózge sholý
***
Bıyl Qazaqstannyń Áskerı-teńiz kúshteriniń qurylǵanyna - 20 jyl. Áskerı-teńiz floty memleket Qarýly Kúshteriniń quramdas bóligi sanalatyndyqtan, onyń negizgi qyzmeti teńizdegi (muhıttaǵy) urystar kezinde dushpannyń Áskerı-teńiz kúshterin talqandaýǵa, onyń jaǵalaýdaǵy ónerkásiptik-ekonomıkalyq aýdandary men mańyzdy áskerı nysandaryn joıýǵa nemese qurlyqtaǵy óz nysandaryn teńizden (muhıttan) jasalǵan shabýyldardan qorǵaýǵa baǵyttalǵan. Otanymyzda alǵash ret ótkizilgeli otyrǵan jaýyngerlik parad qarsańynda «Egemen Qazaqstan» gazeti bul jaýapkershiligi mol sharaǵa Áskerı-teńiz flotynyń úles qosatynyn eskere otyryp, Qazaqstan Respýblıkasy Qarýly Kúshteri Áskerı-teńiz kúshteriniń Bas qolbasshysy, kontr-admıral Jandarbek Januzaqovpen jarııalady. Áńgime barysynda ózgeshe jaýapkershilik mindetin arqalaǵan Áskerı-teńiz kúshteriniń búgingi áleýeti jaıynda sóz qozǵalǵan suhbat «Áskerı-teńiz kúshteriniń áleýeti artyp keledi» degen taqyryppen berilgen.
Osy basylymnyń jazýynsha, «Otar» 40-shy áskerı bazasynda elimizde tuńǵysh ret ótkizilgeli otyrǵan jaýyngerlik paradtyń bas jattyǵýlary bolyp ótti. Bul 7 mamyrda keń kólemde merekelenetin Otan qorǵaýshy kúnine arnalǵan alǵashqy jaýyngerlik paradqa daıyndyqtyń sońǵy qorytyndy kezeńi bolyp tabylady. 2013 jylǵy 7 mamyrda «Otar» 40-shy áskerı bazasynyń polıgonynan Otan qorǵaýshy kúnine arnalǵan jaýyngerlik parad tikeleı translıatsııalanatyn bolady. Polıgonda Qurlyq áskerleriniń barlyq qarý-jaraq túrlerinen jaýyngerlik atystar júzege asyrylady. Qazaqstan Áskerı-áýe kúshteriniń ushaqtary men tikushaqtarynan zymyrandar naqty túrde jiberilip, bombalaý tájirıbe júzinde qoldanylady. Kaspıı teńizi akvatorııasyndaǵy Qazaqstan Áskerı-teńiz kúshteri kemeleriniń jaýyngerlik atysy onlaın-rejiminde taratylady.
***
«Qazaqstanda 2002-2010 jyldary «Aýyzsý» salalyq baǵdarlamasy boıynsha paıdalanýǵa berilgen sý nysandarynyń 9 paıyzǵa jýyǵy jumys istemeıdi. Bul týraly Bas prokýrordyń orynbasary Jaqyp Asanov habarlady»,- dep jazady «Aıqyn» gazeti «Sýǵa qatysty shý» degen taqyryptaǵy maqalasynda. Basylymnyń naqty derekterine sáıkes, bul 200-ge jýyq nysan bolyp otyr, sonyń ishinde 42-si paıdalanýǵa berilgen. Jaqyp Asanovtyń aıtýynsha, respýblıkalyq jáne oblystyq deńgeılerdegi memlekettik organdardyń birde-bireýinde sýmen qamtý nysandary boıynsha jetkilikti aqparat joq. Al jumys istemeıtin nysandardyń tolyq tizimi túrli memlekettik organdarmen birneshe ret salystyrǵannan keıin ǵana jasalǵan. 2012 jyly merdigerlik uıymdardyń basshylyǵyna jáne aıypty laýazymdy tulǵalarǵa qatysty 17 qylmystyq is, sonyń ishinde prokýratýra organdarymen yqpal etýimen 10 qylmystyq is qozǵalǵan.
Aqtóbe oblystyq Ulttyq qaýipsizdik komıteti departamentiniń ǵımaratyna shabýyl jasaǵan Batys Qazaqstan oblysynyń eki turǵynyna №2 Aqtóbe qalalyq soty úkim shyǵardy. Bul jaıynda «Aıqyn» gazetiniń senbilik sanyndaǵy «Sot úkim shyǵardy» degen taqyryptaǵy maqalada baıandalǵan. Basylymnyń jazýynsha, Aqtóbe oblystyq Ulttyq qaýipsizdik komıteti departamentiniń basshylaryna qastandyq jasaýdy josparlaǵan degen aıyppen batysqazaqstandyq Aıbek Tańatarov pen Eltaı Eleýov ótken jyldyń aıaǵynda qamaýǵa alynǵan bolatyn. Sáýir aıynda bastalǵan sot úderisi aıaqtalyp, №2 Aqtóbe qalalyq sotynyń sýdıasy Dáýrenbek Daýymov aıyptalýshylarǵa shyǵarylǵan úkimdi oqydy. Aıyptalýshy Aıbek Tańatarov Qylmystyq kodekstiń 58 babynyń 3 bóliginde qarastyrylǵan jazaǵa sáıkes 5 jylǵa kesildi, al onyń janynda bolǵan Eltaı Eleýov 4 jylǵa bas bostandyǵynan aıyryldy.
***
«Kazahstanskaıa pravda» gazetiniń senbilik sanynda Qazaqstan Respýblıkasynyń Prezıdenti Nursultan Nazarbaevtyń qazaqstandyqtardy Pasha merekesimen quttyqtaýy jarııalandy. Onda: «Qymbatty otandastar! Barsha pravoslavıe hrıstıandaryn jarqyn da mereıli Pasha merekesimen shyn júrekten quttyqtaımyn! Bizdiń kópkonfessııaly elimizde qazaqstandyqtar dinı senimderi men etnostyq erekshelikterine qaramastan, mańyzdy dinı meıramdar qýanyshyn ózara bólisedi, sol arqyly halyqtyń rýhyn odan ári asqaqtata túsedi. Bul meıramdar adamgershilik, tárbıe, qaıyrymdylyq mádenıetin damytý, gýmanızm murattaryn ornyqtyrý, áleýmettik turaqtylyqty bekemdeý arqyly jańa mazmunǵa ıe bolýda. Dinı tózimdilik, tatý kórshilik, jaqyn-jýyqqa qamqorlyq qazirgi zamanǵy Qazaqstan qoǵamynyń izgi baǵyttarynan berik oryn alyp otyr. Pravoslavıe dinı qaýymy beıbitshilik pen kelisimdi nyǵaıtýǵa óziniń qomaqty úlesin qosyp keledi», - delingen.
