Sý tasqyny saldarynan 6,8 myń bas mal qyryldy – AShM
ASTANA. KAZINFORM – Respýblıkalyq shtab qyrylǵan maldardyń qunyn óteý algorıtmin bekitti. Sonymen qatar qyrylǵan mal ólekseleriniń 96% joıyldy. Bul týraly Aýyl sharýashylyǵy mınıstrliginiń resmı ókili Oljas Tilebaldın málim etti.
«Zalaldy óteý jáne derekterdi salystyrý jónindegi komıssııasy anyqtaǵandaı búginde sý tasqyny saldarynan 6,8 myń bas mal qyryldy, onyń 75% usaq mal. Mınıstrliktiń respýblıkalyq epızootııaǵa qarsy jasaǵy oblys ákimdikterimen birlesip, ólekselerdi jınaý jáne joıý jumystaryn jalǵastyrýda. Qazirgi ýaqytta qyrylǵan mal ólekseleriniń 96% joıyldy. Sý tasqynyna qarsy is-sharalardy úılestirý jáne zardaptardy joıý jónindegi respýblıkalyq shtab qyrylǵan maldardyń qunyn óteý algorıtmin bekitti», - dedi Oljas Tilebaldın Ortalyq kommýnıkatsııalar qyzmeti alańynda ótken baspasóz máslıhatynda.
Onyń aıtýynsha, mal ótemaqysyn alý maqsatynda ıeleri zalaldy aktileý úshin jergilikti komıssııaǵa júginýi qajet.
«Ótemaqy mólsheri Ulttyq statıstıka bıýrosy jarııalaıtyn janýarlardyń túrleri men jas erekshelikteri boıynsha naryqtyq quny týraly derekter negizinde aıqyndalady», - deıdi ol.
