Qytaıdyń ońtústiginde jasandy ıntellekt sýdıalar tıimdiligin eki esege arttyrdy
ASTANA.KAZINFORM - Shenchjen sot júıesi jasandy ıntellekt tehnologııalaryn engizý arqyly Gýandýn provıntsııasynda eń ónimdi sot júıesi retinde tanyldy, dep habarlaıdy South China Morning Post.
Shenchjen halyq soty qala sýdıalarynyń 2025 jyly aldyńǵy jylmen salystyrǵanda 50%-ǵa kóp is qaraǵanyn habarlady. Ónimdiliktiń bul kúrt ósýi mamandandyrylǵan iri kólemdi tildik modelderge negizdelgen eldegi alǵashqy pılottyq júıe ıntegratsııasynyń arqasynda múmkin boldy.
Sot bir sýdıaǵa qaralǵan isterdiń ortasha sany 744-ti quraǵanyn, bul 2024 jylmen salystyrǵanda 249-ǵa kóp jáne Qytaıdaǵy 354 is boıynsha ulttyq ortasha kórsetkishten eki esege jýyq ekenin qosa aıtty.
Zııatkerlik júıe azamattyq, ákimshilik jáne qylmystyq ister boıynsha 85 sot protsedýrasyn qamtıdy, sonyń ishinde talap aryz berý, materıaldardy qaraý, sot otyrystary jáne qujattardy daıyndaý.
Shenchjen qalalyq sotynyń vıtse-prezıdenti Kýan Sıaohýa pılottyq baǵdarlama tehnologııanyń sot júıesi úshin qundylyǵyn dáleldegenin atap ótti. Ol jasandy ıntellektti sot isin júrgizý sııaqty salada qoldanýǵa bola ma degen pikirtalas áli de jalǵasyp jatqanymen, Shenchjen buǵan naqty jaýap bergenin aıtty.
Naýryz aıynda Joǵarǵy Halyq Sotynyń tóraǵasy Chjan Tszıýn «Shenchjen modeliniń» nátıjelerin joǵary baǵalap, pılottyq jobanyń el boıynsha 11 provıntsııadaǵy ártúrli deńgeıdegi 23 sotta júzege asyrylǵanyn habarlady.
Buǵan deıin Qytaı mamandandyrylǵan robototehnıkany modeldengen ıntellekt deńgeıine kóteretinin habarlaǵan edik.
