Sý tasqyny: Oraldaǵy Derkól kentinde 100-den astam úıdiń kilti berildi

ORAL. KAZINFORM — QR Konstıtýtsııasy kúnine oraı Oral qalasyndaǵy Derkól kentinde sý tasqynynan zardap shekken otbasylarǵa 103 turǵyn úıdiń kiltteri saltanatty túrde tabys etildi.

Atalmysh kenttiń «Kókjıek» shaǵynaýdanynda barlyq úıler úlgi jobada salyndy. Úsh bólmeli úılerdiń aýdany – 80 sharshy metrden.

Qala aýmaǵynda Derkól kentinen bólek Zachaganda jáne «Juldyz» shaǵynaýdanynda barlyǵy 375 úı boı kóterdi. Qurylysty 30-dan astam jergilikti merdiger mekeme júrgizdi. Bul úılerdi salýǵa «ERG» kompanııasy demeýshilik etken.

Kiltterdi saltanatty tabystaý rásimine qatysqan oblys ákimi Narıman Tóreǵalıev jańa qonys ıelerin quttyqtady.

«Memleket basshysynyń tapsyrmasymen Batys Qazaqstan oblysynda sý tasqynynan zardap shekken otbasylarǵa qajetti kómek kórsetilip jatyr. Naryqtaǵy páterlerdi satyp alýmen qatar, osyndaı turǵyn úılerdi salyp jatyrmyz. Bul rette tasqynnan japa shekkenderdi baspanamen qamtýǵa demeýshilik qoldaý jasap jatqan elimizdegi iri kompanııalarǵa alǵys bildiremiz. Búgin, mine, Derkól kentinen 103 úıdi qoldanysqa berip jatyrmyz. Jańa qonys ıelerin shyn júrekten quttyqtaımyn. Jańa oqý jyly bastalar tusta osyndaı qýanyshqa kenelip otyrsyzdar. Shańyraqtaryńyz qut-berekege tolsyn!» - dedi óńir basshysy.

Budan keıin «ERG kómek» korporatıvtik qory bas dırektorynyń orynbasary Danııar Rahmatýllaev sóz alyp, úı ıeleriniń qýanyshyna ortaqtasty.

Oral qalasynda kúni búginge deıin sý tasqynynan zardap shekken 1 548 otbasyǵa úı berildi. 10 myńǵa jýyq otbasyǵa 3 mıllıard teńge kóleminde bir rettik áleýmettik kómek kórsetilse, 4 568 azamattyń múliktik shyǵyndary óteldi

Eske sala keteıik, budan buryn Oralda tasqynnan japa shekkenderge arnalǵan úılerdiń qalaı salynyp jatqanyn jazǵan bolatynbyz.

Sondaı-aq Batys Qazaqstanda úıleri sýǵa ketken taǵy 23 otbasy baspanaly boldy.