4000-ǵa jýyq stýdent AI-SANA baǵdarlamasyn aıaqtady
ASTANA. KAZINFORM – Ǵylym mınıstrliginde AI-SANA baǵdarlamasyn iske asyrý talqylandy.
Ǵylym jáne joǵary bilim mınıstrliginde Ǵylym jáne joǵary bilim mınıstri Saıasat Nurbektiń jasandy ıntellekt salasyndaǵy halyqaralyq sarapshy, AI-SANA bilim berý baǵdarlamasynyń negizgi ázirleýshileriniń biri Pol Kımmen jumys kezdesýi ótti.
Kezdesýge sondaı-aq vedomstvolyq uıymdardyń ókilderi jáne «Qazaqstan halqyna» QQ joba seriktesteri qatysty. Taraptar AI-SANA baǵdarlamasynyń II kezeńin iske asyrýdyń aǵymdaǵy jaı-kúıin, sonyń ishinde oqý úderisi men stýdentterdiń qatysý deńgeıin talqylady.
Kezdesý barysynda Pol Kım Stenford ýnıversıtetiniń ádisnamasyna negizdelgen baǵdarlamanyń II jáne III kezeńderin iske asyrý tásilderin tanystyrdy, sondaı-aq SMILE platformasyndaǵy praktıkalyq baǵyttaǵy oqytý formaty týraly keńinen baıandady. Teorııalyq bilim men praktıkalyq tapsyrmalardy ushtastyrýǵa, kásipkerlik oılaý men AI sheshimderin ázirleý daǵdylaryn damytýǵa erekshe nazar aýdaryldy.
Onyń aıtýynsha, baǵdarlama naqty nátıjeler kórsetip otyr. Shamamen 4 000 stýdent oqýyn sátti aıaqtap, sertıfıkattar alǵan, startaptardy qurýǵa arnalǵan venchýrlik josparlar formatynda 3 000-nan astam qorytyndy joba ázirlengen. Qazirgi tańda platformada ondaǵan myń stýdent oqýyn jalǵastyryp jatyr (baǵdarlamaǵa qatysýshylardyń jalpy sany – 100 000), bul baǵdarlamanyń ulttyq deńgeıde iske asyrylyp jatqanyn kórsetedi.
Kezdesýge qatysýshylar stýdentterdiń belsendiligin odan ári arttyrýdyń jáne joǵary oqý oryndary tarapynan oqý protsesin sapaly súıemeldeýdiń mańyzdylyǵyn atap ótti. Sondaı-aq kýratorlar jumysyn jandandyrý jáne óńirlerde baǵdarlamanyń oryndalýyn baqylaýdy kúsheıtý qajettigi aıtyldy.
Kezdesý qorytyndysy boıynsha AI-SANA jobasyn aýqymdaýdy jalǵastyrý, bilim berý baǵdarlamalaryn iske asyrý tıimdiligin arttyrý jáne Qazaqstanda jasandy ıntellekt salasyndaǵy kadrlyq áleýetti damytý baǵytynda júıeli jumysty jalǵastyrý týraly kelisimge qol jetkizildi.
Aıta ketelik Petropavlda CyberShield-2026 respýblıkalyq hakatonyna qatysqan bolashaq IT mamandar jasandy ıntellekt pen kıberqaýipsizdik baǵytynda óz jobalaryn qorǵaǵan edi.
