Sý tasqyny: Atyraý halqyna Qıǵash ózeninen qaýip bar ma
ATYRAÝ. KAZINFORM – Atyraý oblysy Qurmanǵazy aýdanynyń aýmaǵynan ótip jatqan Qıǵash ózeniniń arnalaryn tereńdetý jumysy júrip jatyr. Óıtkeni, tasqyn qaýpi bar. Bul týraly aýdan ákimi Abat Janǵalıev aıtty.
Teńizdiń tartylyp ketýine, Qıǵash ózeniniń keıbir salalarynyń qurǵap qalýyna baılanysty 2025 jyldyń shildesinde tabıǵı sıpattaǵy tótenshe jaǵdaı aýdan boıynsha jarııalanǵan bolatyn. Qazirgi ýaqytta aýdan aýmaǵynda eki joba iske asyp jatyr. Olar: «Atyraý oblysy sheginde Qıǵash ózeniniń sý kólemin ulǵaıtý jáne gıdrologııalyq rejımin jaqsartý №2» jáne «Jarqosyn jáne Ganıýshkın kanaldaryn tereńdetý (teńiz bóligi)».
Eki jobaǵa «Bertys Construction» JShS jaýapty. Kelisimshart bir kózden jasalǵan. Jalpy bul jumystarǵa qaralǵan qarjynyń kólemi 40 mlrd teńgeniń shamasynda.
– Qıǵash ózeniniń túbin tereńdetý jumysy byltyr qarasha aıynda bastaldy. Qazir aýdandaǵy Shora ózeniniń Kókarna, Surhan, Týhlyı, Qyzyljar dep atalatyn kanaldar tereńdetilip jatyr. Jalpy 128 shaqyrym qazylý kerek. Búginde 60 shaqyrymnan asa arna qazyldy,- dedi aýdan ákimi Abat Janǵalıev.
Ákimdiktiń resmı aqparatyna súıensek, 2 kanaldyń túbin tereńdetý jumysy aıaqtalyp, beseýinde jumys jalǵasyp jatyr.
Atap aıtqanda:
ıAgodnyı kanaly, Qurmanǵazy aýyly (6 047 m) – 6 047 m ózenniń túbi tolyqtaı tereńdetildi;
Súrhan kanaly, Alǵa aýyly (3 473,74 m) – 3 473,74 m ózenniń túbi tolyqtaı tereńdetildi;
Kókarna kanaly, Nurjaý aýyly (15 397 m) – 6,1 km ózenniń túbi tereńdetildi, barlyǵy 15 dana tehnıka jumyldyrylǵan;
Qyzyljar kanaly, Orly aýyly (12 941 m) – 9,7 km ózenniń túbi tereńdetildi, barlyǵy 11 dana tehnıka tartylǵan;
Týhlyı kanaly, Orly aýyly (9 964 m) – 6,3 km ózenniń túbi tereńdetildi, 4 ekskovator jumys isteýde;
Kadyr kanaly, Kadyrka aýyly (15 849 m) – 4,25 km ózenniń túbi tereńdetildi, 9 dana tehnıka, onyń ishinde 8 dana ekskovator, 1 dana zemsnarıad jumyldyrylǵan;
Kókarna kanaly, Alǵa aýyly (Maqash a/o - 7 775,25 m) – 2,3 km ózenniń túbi tereńdetildi, 22 tehnıka jumystyń basy-qasynda júr;
Súrhan kanaly, Jumeken aýyly (20,12 km) – 0,8 km ózenniń túbi tereńdetildi.
– RF-daǵy áriptesterimizben sóılesip otyrmyz. Qyzylsý kóbirek keledi degen boljam bar. Soǵan sáıkes arnalardy tezirek qazyp, sýdy ustap qalýǵa tyrysyp jatyrmyz. Merdiger mekemege múmkindiginshe sol jumystardy toqtatpaı, kúni-túni isteý týraly tapsyrma berdik, - dedi aýdan ákimi Abat Janǵalıev.
Aıta keteıik, jýyqta oblys ákimi óńirdegi tasqyn kezeńine daıyndyq jumystaryn pysyqtap, jıyn ótkizdi. 1 naýryzdaǵy jaǵdaı boıynsha 9 meteorologııalyq stantsııa, 2 avtomattandyrylǵan meteostantsııa, 12 gıdrologııalyq beket jáne 3 agrometeorologııalyq pýnkt arqyly gıdrometeorologııalyq ahýalǵa monıtorıng júrgizilip jatyr.
«Qazgıdromet» RMK Atyraý fılıalynyń málimetinshe, oblys ózenderi basseınindegi ylǵaldaný deńgeıi 47%-dan 67%-ǵa deıingi aralyqta, kórsetkish qalypty deńgeıden tómen. Byltyrǵymen salystyrǵanda jaýyn-shashyn kólemi 51%-ǵa azaıǵan. Aldyn ala boljam boıynsha Jylyoı aýdanyndaǵy Jem ózeniniń jáne Qyzylqoǵa aýdanyndaǵy Saǵyz ózeniniń tasý qaýpi tómen. Qaýip deńgeıi tómen aýmaqtar qatarynda Qyzylqoǵa, Maqat, Inder, Mahambet, Isataı aýdandary men Atyraý qalasy da bar. Atyraý qalasynda, sondaı-aq Jylyoı, Qyzylqoǵa, Inder jáne Mahambet aýdandarynda 106,3 shaqyrymdyq qorǵanys bógetteri nyǵaıtyldy.
Osyǵan deıin Jaıyqty jaǵalaı ornalasqan aýyldarda tasqynǵa daıyndyq týraly jazǵan edik.