Sý tasqyny: Aqtóbeniń Jaryq aýylynda 17 úı berildi
AQTÓBE. KAZINFORM - Aqtóbeniń Jaryq aýylynda 17 otbasy jańa úıge kóshti. Tasqyn kezinde munda 24 úıge sý kirip, búlindi.
Qobda aýdanynyń Jaryq aýylynda 83 úı bar. Tasqyn kezinde 24 úıge sý kirdi. 5 otbasy Qobda aýdanyna kóship, sol jaqta úı salyndy. Al 17-si aýylda qalyp, osynda qurylys júrdi. Ózgesine jóndeý jasaldy.
- Tasqyn kezinde barlyǵy mektepke evakýatsııalandy. Sodan keıin aýylda bos turǵan úılerge bólip, qonystandyrdyq. Dalada qalǵan eshkim joq, - dedi Jaryq aýyldyq okrýginiń ákimi Tańat Kenbaev.
Konstıtýtsııa kúni munda adamdar jańa úıge qonystandy.
- Sý tasqynynan zardap shektik. Qazir bári jaqsy. Bárine alǵys aıtamyn. Úıimiz óte jaqsy salyndy. Biz qýanyshtymyz, - dedi Jaryq aýylynyń turǵyny Alma.
Aqtóbe oblysynyń ákimi Ashat Shaharov sabyrmen kútken turǵyndarǵa alǵys aıtty.
- Búgin biz úshin, sizder úshin de aıtýly kún. Qıyndyqtan aman-esen ótip, elimizge mańyzdy merekede, qýanyshta kezdesip otyrmyz. Bıyl sáýir aıynda kezdesip, biraz máseleni talqylap, 3-4 aıdan keıin kezdesýdi josparlap edik. Prezıdent tapsyrmasy aýyzbirshiliktiń arqasynda oryndaldy. Oǵan “Bolat Ótemuratov” qory demeýshilik jasady. Shynaıy rızashylyǵymyzdy bildiremiz. Úıden aıyrylyp, balalar da qınaldy. Sabyr saqtap, shydadyńyzdar, alǵys aıtamyn, - dedi Aqtóbe oblysynyń ákimi Ashat Shaharov.
Aıta keteıik, tasqyn kezinde Jaryq aýylynda bóget buzylǵan. Sebebi Qobda ózeni aǵyp, Elekke quıar tusta keri tepken. Qazirgi kezde munda jol qurylysy júrip jatyr. Qurylys jumystaryna 313 mln teńge bólindi. Barlyǵy 950 metr jol qalpyna keltiriledi.
Eske salsaq, búgin Qobda aýdany ortalyǵynda 100 úı kilti tabystaldy.
