Pedagogterdiń tsıfrlyq júktemesine aýdıt júrgizilip jatyr
ASTANA. KAZINFORM — Pedagogterdiń tsıfrlyq júktemesine aýdıt júrgizilip jatyr. Bul týraly Májilis depýtattarynyń saýalyna Premer-mınıstrdiń orynbasary — Mádenıet jáne aqparat mınıstri Aıda Balaevanyń jaýabynda aıtylǵan.
— Elimizdiń mektepterinde belgilengen talaptarǵa sáıkes keletin tórt tsıfrlyq platforma (Kundelik, BilimClass, Bilimal, EDUS.Mektep — LMS-júıeleri) qoldanylady. Atalǵan tsıfrlyq platformalardyń fýnktsıonaly eseptilik protsesterin avtomattandyrýǵa jáne pedagogke túsetin ákimshilik júktemeni azaıtýǵa múmkindik beredi. Máselen, LMS-júıeler arqyly toqsandyq, jyldyq baǵalar men esepter avtomatty túrde qalyptastyrylady, — dedi Aıda Balaeva.
Onyń atap ótýinshe, LMS-júıeler basqa da tsıfrlyq servıstermen (tapsyrmalar, testter, kýrstar katalogy, beınekonferentsııalar jáne elektrondyq oqýlyqtar) ıntegratsııalanǵan. Bul pedagogterge oqý protsesinde daıyn bilim berý materıaldaryn paıdalanýǵa múmkindik beredi.
— Pedagogterdiń tsıfrlyq júktemesine aýdıt júrgizý úshin Oqý-aǵartý mınıstrligi tájirıbeli pedagogter, ádiskerler jáne IT-mamandardy tarta otyryp, jumys tobyn qurdy. Jumys toby pedagogtiń LMS-júıede jumys isteý ýaqytyn (taqyryptyq josparlardy toltyrý, baǵalar qoıý, úı tapsyrmalaryn baqylaý jáne t. b.) taldaýda. Jumys qorytyndysy boıynsha LMS-júıelerdiń fýnktsıonalyn ońtaılandyrý jáne qaıta qaraý (kúndelikti qaıtalanatyn tapsyrmalardy avtomattandyrý, qaıtalanatyn fýnktsııalardy joıý) jóninde naqty usynystaryn qamtıtyn esep ázirlenedi. Bul usynystar qoldanystaǵy normatıvtik quqyqtyq aktilerge ózgerister engizý kezinde de eskeriletin bolady, — dedi vıtse-premer.
Buǵan deıin Almatynyń mamandyrylǵan aýdanaralyq ekonomıkalyq soty «Kúndelik» JShS-niń Almaty qalasynyń bilim berý uıymdarynyń BilimClass platformasyna kóshýine qandaı da bir shekteýler qoıý týraly ótinishin qabyldamaǵan edi.
