Sý tasqyny: Aqtóbelik sharýalardyń múlik shyǵyny endi óteledi

AQTÓBE. KAZINFORM – Aqtóbe oblysynda 57 kásipkerdiń shyǵyny óteldi. Taǵy 10-ǵa jýyǵynyń ótinishi qanaǵattandyryldy. Sonymen birge sharýalardyń jyljymaıtyn múlik shyǵyny óteledi.

Tasqyn kezinde kóbine ózen jaǵasyndaǵy demalys orny, meıramhana, shaǵyn tsehtar sýǵa ketti. Al aýdan, aýyldarda dúkender jaramsyz bolyp qaldy. Qazirgi kezde shyǵynnyń basym bóligi óteldi.

- Sý tasqynynan zardap shekken kásipkerlerge Ulttyq ekonomıka mınıstrligi ereje bekitti. Maýsym aıynda oǵan qajetti ózgerister engizildi. Qaǵıdalarǵa sáıkes óńirlik komıssııa jumys istedi. Ereje boıynsha qujat 10 jeltoqsanǵa deıin qabyldanady. Tasqynnan soń 67 kásipkerlik sýbektisi óńirlik komıssııaǵa júgindi. Olardyń aryzy boıynsha 724 mln 200 myń teńge qarastyryldy. 57 sýbekti qarjyny aldy. Qalǵanyn qazan aıynda aýdaramyz,- dedi Aqtóbe oblystyq kásipkerlik basqarmasynyń basshysy Almas Salyqbaev.

Qazirgi kezde agroónerkásip salasyndaǵy kásipkerlerdiń shyǵynyn óteý joly bekitildi. Buǵan deıin mal shyǵyny qaıtarylsa, endi jyljymaıtyn múlik shyǵyny óteledi.

- Aýdan ákimderine baǵalaýshy mekemelerdiń aqparaty berildi. Sharýa qojalyqtarynan tek jyljymaıtyn múlik boıynsha ótinim qabyldanady. Aýdan ákimdigi zardap shekkeni týraly qujat beredi, múlik týraly qujaty jáne taldaý qorytyndysy negizinde komıssııa otyrysy ótkiziledi,- dedi Almas Salyqbaev.

Aıtyp óteıik, óńirde kásipkerlerdiń eń az shyǵyny 552 myń teńge, eń kóbi 72 mln teńge. Zardap shekkender Aqtóbe qalasy men Oıyl, Yrǵyz aýdandarynda kóp tirkeldi.

Eske salsaq, Aqtóbe oblysy boıynsha qyrkúıek aıynda 44 kásipkerdiń shyǵyny óteldi.