Sý tasqyny: Aqtóbede 3 myńǵa jýyq mal qyryldy

AQTÓBE. KAZINFORM – Qazirgi kezde 3 myńǵa jýyq maldyń tasqynǵa shydas bermeı sýmen qosa aǵyp ketkeni, sonymen birge sýda qalǵany anyqtalyp otyr. Óńirde shyǵyndy óteý tetigi qarastyrylyp jatyr.

Aqtóbe oblysy Aýyl sharýashylyǵy jáne jer qatynastary basqarmasy qazir mal shyǵynyn tirkep jatyr. Ázirge 3 myń basqa jýyq tórt kólik tizimge alyndy. 

— Kún saıyn aýdandardan jedel málimet jınaqtap otyrmyz. Búginde 3 myńǵa jýyq maldyń ólgeni anyqtaldy. Olar sýǵa aǵyp ketken, keıbiri sýda qalǵan. Tarqatyp aıtap bolsaq, 300-ge jýyq jylqy, 600 basqa jýyq iri qara, 2 myńnan astam usaq mal, 7 túıe bar. Kóbine Oıyl jáne Qobda aýdandarynda kóp tirkeldi. Degenmen Baıǵanın, Yrǵyz aýdandarynda da bar. Bul tsıfr aldaǵy kúnderi naqtylanady. Sonymen birge malshylardyń úıi, qorasynyń qulaý derekteri de jınastyrylyp jatyr, — dedi Aqtóbe oblystyq aýyl sharýashylyǵy jáne jer qatynastary basqarmasynyń bólim basshysy Panabek Bımuratov.

Onyń aıtýynsha, qazir aýdan, aýyldaǵy mal dárigerleri úı-úıdi, sharýashylyqtardy aralap, tirkeý jumystaryn júrgizip jatyr. Degenmen keıbir sharýashylyqtarǵa barar jol joq, sý qaıtpaǵan. 

— Oblys ákimi shyǵyndy jergilikti bıýdjet esebinen de qarastyratynyn málimdedi. Qazir tirkep, naqtylap, qujattary jınalady. Keıin sol maldyń bazardaǵy ortasha quny anyqtalyp, shyǵyn óteledi. Bul bir emes, birneshe aıda sheshiletin jumys. Al derekter kún saıyn jańartylyp, QR Aýyl sharýashylyǵy mınıstrligine jiberilip otyr. Sharýalardyń nesıesi, sýbsıdııaǵa alǵan tehnıkasyna qatysty suraqtardy sheshý joly da qarastyrylady. Ázirge qarjy ınstıtýttaryna habar berildi, — dedi Panabek Bımuratov.