SQO-da joǵary suranysqa ıe TOP-5 mamandyq belgili boldy
PETROPAVL. KAZINFORM – Soltústik Qazaqstan oblysynda aldaǵy eki jylda eńbek naryǵynda kadr tapshylyǵy saqtalyp, shamamen 5 myńǵa jýyq maman qajet bolady.
SQO Kásipkerler palatasy jumys berýshiler arasynda dástúrli saýalnama júrgizip, nátıjesin jarııalady. Zertteý qorytyndysy aldaǵy kezeńge memlekettik bilim berý tapsyrysyn qalyptastyrý kezinde eskerilmek.
Bıyl saýalnama 2 aqpan men 20 naýryz aralyǵynda júrgizilip, oǵan oblystaǵy 1,5 myńǵa jýyq kásiporyn qatysty. Onyń ishinde 800-den astamy jeke kásipker, qalǵany – zańdy tulǵa. Qatysýshylardyń basym bóligi shaǵyn jáne mıkrobıznes ókilderi, ıaǵnı 10 adamǵa deıingi qyzmetkeri bar 917 kásiporyn jáne 10-nan 99 adamǵa deıin jumys isteıtin 443 shaǵyn kompanııa qamtyldy. Sonymen qatar 88 orta jáne 23 iri kásiporyn qatysty. Olardyń negizgi bóligi aýyl sharýashylyǵy, saýda jáne qyzmet kórsetý salalarynda jumys isteıdi. Sondaı-aq bilim berý, kólik, óńdeý ónerkásibi salalaryndaǵy jumys berýshiler de belsendilik tanytqan.
– Júrgizilgen monıtorıngke sáıkes, 2026–2028 jyldary óńirde 5 myńǵa jýyq mamanǵa qajettilik týady. Onyń basym bóligi – 3,1 myń adam nemese jalpy suranystyń 64%-y Petropavl qalasyna tıesili. Sonymen qatar Esil aýdanynda 244, Aqqaıyń aýdanynda 229, Ǵabıt Músirepov atyndaǵy aýdanda 183 jáne Tımırıazev aýdanynda 177 maman qajet bolady. Keıingi úsh jylda alǵash ret memlekettik basqarý salasy kadr jetispeýshiliginen kósh bastady, munda qazir 1114 bos jumys orny bar, - deıdi SQO Kásipkerler palatasynyń dırektory Esjan Orazalın.
Budan bólek, aýyl sharýashylyǵynda 822, saýda salasynda 509, óńdeý ónerkásibinde 416 bos jumys orny tirkelgen. Elektr energııasy men gazben jabdyqtaý salasynda da suranys joǵary – 545 vakansııa tur. Al taý-ken ónerkásibi men aqparat jáne baılanys salalary kadr jetispeýshiliginen sońǵy orynda tur.
Zertteý nátıjeleri eńbek naryǵynda jumysshy mamandyqtary men tehnıkalyq bilikti kadrlarǵa suranys joǵary ekenin kórsetti. Eń qajet mamandyqtardyń qatarynda aspaz, elektromonter, logoped, avtoslesar jáne traktorshy-mashınıst bar. Sonymen qatar mehanızator-ınjenerlerge, medıtsınalyq qyzmetkerlerge jáne dene shynyqtyrý páni muǵalimderine de suranys saqtalyp otyr.
– Bilim deńgeıine kelsek, jumys berýshilerdiń basym bóligi tehnıkalyq jáne kásiptik bilimi bar mamandardy qajet etedi. Mundaı 3 myńǵa jýyq bos jumys orny bar. Joǵary bilimi bar 1250 maman kerek. Sonymen qatar tek mektep bilimi bar azamattarǵa 304 vakansııa usynylǵan. Qysqa merzimdi kýrstardan ótken 62 adam jumysqa tura alady. 217 jaǵdaıda bilim deńgeıi mańyzdy emes, - deıdi SQO Kásipkerler palatasynyń bólim basshysy Irına Toropova.
Jınalǵan derekter tıisti memlekettik organdarǵa joldanyp, óńirdegi kolledjder men joǵary oqý oryndarynyń oqý baǵdarlamalaryn eńbek naryǵynyń naqty suranysyna sáıkestendirý, sondaı-aq bilim granttaryn tıimdi bólý úshin paıdalanylatyn bolady.
Buǵan deıin Qazaqstanda 10 myń jumysshyǵa 7 robottan ǵana keletinin jazǵan edik.
