Sý tasqyny: Aqtóbede 400-den astam úı satyp alyndy
AQTÓBE. KAZINFORM – Aqtóbe oblysy boıynsha sý tasqyny kezinde 4 myńnan astam úı búlindi. Onyń myńnan astamy jaramsyz dep tanylyp, teń jartysy salynyp jatyr. Al teń jartysy daıyn úı satyp alýǵa sheshim qabyldaǵan.
Aqtóbe oblysynda sý tasqynynan keıin qalpyna keltirý jumysy jalǵasyp jatyr. Oblys ákimi baspasóz qyzmetiniń habarlaýynsha, barlyǵy 4 myńnan astam úı men saıajaıdaǵy úı zardap shekti. Onyń ishinde 3 myń úıdiń ıesine baspanany jóndeý, qaıta qalpyna keltirý úshin qarjy aýdaryldy. Oblys boıynsha 400-den astam daıyn úı satyp alyndy.
«Qazirgi kezde aýdandarda 511 úı salynyp jatyr. Sonymen birge turǵyndardyń qalaýy boıynsha 503 úıdi satyp alý jumysy júrgiziledi. Óńirdegi úı qurylysy maýsym aıynda bastaldy. Jospar boıynsha qyrkúıekte tolyq aıaqtalady dep otyrmyz. Máselen, Qobda aýdanyndaǵy úıler shilde aıynyń sońynda aıaqtalyp, qoldanysqa beriledi. Al Yrǵyzdyń Saryoda jerindegi úı qurylysy oblys boıynsha eń sońynda aıaqtalady. Sebebi aýyl Nuradan kóshirilip, keshteý bastaldy», - dedi Aqtóbe oblystyq Qurylys, sáýlet jáne qala qurylysy basqarmasy basshysynyń orynbasary Aslan Jarasbaev.
Al Aqtóbe qalasynda úı salynbaıdy, tek jańa páterler satyp alynady. Olarǵa Altyn orda, Eset batyr, ıÝnıs sıtı turǵyn alaptarynan jańa páter berilip jatyr.
«Qalada 200 páter satyp alyp berý josparlanyp otyr. Qalǵan 303 úı aýdandarda. Bul baǵyttaǵy jumystar Muǵaljar, Áıteke bı, Oıyl, Qobda, Yrǵyz, Temir aýdandarynda júrip jatyr. Ereje boıynsha úıi jaramsyz dep tanylǵan adammen arada kelisim júredi. Aýdan boıynsha daıyn úı satyp alǵysy kelse, úı izdeıdi. Aýdanda baǵasy 20 mln teńgeden aspasa, baǵalaý ótkizilip, satyp alynady. Al qalada birinshi naryqtan páter berilip jatyr», - dedi Aslan Jarasbaev.
Aıta keteıik, Aqtóbe oblysy boıynsha 50-ge jýyq merdiger mekeme qurylys jumysyn júrgizip jatyr. Kóbi jergilikti merdiger mekemeler. Qarjy BI Group, Bolat Ótemuratov qory, «Qazaqstan halqyna» qory jáne ERG kompanııalar tobynan bólindi. Sondaı-aq oblys boıynsha 3454 ótinish ıesine materıaldyq shyǵyn úshin qarjy tólendi.
