Baıanaýyldaǵy Jasybaı demalys aımaǵyna kirý qansha turady
PAVLODAR. KAZINFORM — Jasybaı demalys aımaǵynda barlyǵy 54 demalys úıi men 15 qoǵamdyq tamaqtaný orny jumys isteıdi. Demalys úılerine bir mezette 5099 adam qonystana alady.
Baıanaýyl memlekettik ulttyq parkiniń málimetine súıensek, jazǵy týrıstik kezeń endi bir aıdan soń ashylady dep kútilip otyr.
— Ulttyq parktiń aımaǵyna kirý kezinde bir rettik ekologııalyq alymdar qarastyrylǵan. Odan túsken qarajat aýmaqty sanıtarlyq tazartý jáne abattandyrý qyzmetteri úshin jumsalady. Bekitilgen tarıf boıynsha jeke tulǵalar bir táýlikke — 649 teńge, jeńil avtokólikter — 1730 teńge, 16 orynǵa deıingi shaǵyn avtobýstar men aýyr júk avtokólikteri 8650 teńge tóleıdi. Al syıymdylyǵy 32 jolaýshyǵa deıingi avtobýstarǵa — 12 975 teńge, 32 orynnan asatyn avtobýstarǵa tarıf táýligine 21 625 teńge etip bekitilgen. Demalys aımaǵynda 54 demalys úıi men 15 kafe (qoǵamdyq tamaqtaný oryndary) bar, — dep habarlady Kazinform tilshisine Baıanaýyl memlekettik ulttyq tabıǵı parkiniń basshysy Almaz Jumashev.
Byltyr demalys aımaǵyna 177 490 adam kelgen. Al bıyl kelýshiler sany 179 myńnan asady dep kútilip otyr. Ulttyq park aýmaǵynda 14 týrısttik marshrýt belgilengen. Týrısterdiń qaýipsizdigin arttyrý jáne olar úshin qolaıly jaǵdaılar týǵyzý maqsatynda birqatar is-sharalar qolǵa alynyp jatyr.
Bıyl týrıstik marshrýttarda, demalys aımaqtarynda, kólderdiń mańynda jáne parktiń basqa da kelýshiler kóp baratyn oryndarynda jańa baǵyttaýshy belgiler ornatý qarastyrylǵan.
Sondaı-aq zamanaýı talaptarǵa saı eki jańa sanıtarlyq-gıgıenalyq torap ornatý josparlanýda. Ótken jyly satyp alynǵan qatty turmystyq qaldyqtarǵa arnalǵan konteınerler bıyl kelýshiler eń kóp jınalatyn jáne asa qajetti núktelerge tolyq ornalastyrylady. «Qońyr áýlıe úńgiri» týrıstik marshrýty aýmaǵynda týrıster úshin qosymsha yńǵaıly baspaldaqtar ornatý kózdelgen. Bul joǵaryǵa kóterilý barysyn qaýipsiz ári jaıly etedi dep kútilip otyr.
— Sondaı-aq shatyrlar tigiletin qalashyqty abattandyrý aıasynda qosymsha avtoturaq aımaǵyn qurý, aýmaqty qorshaý josparlanǵan. Kelýshiler úshin dárethana ornatylady. Biraq bul jerge sý men elektr energııasyn tartý qarastyrylmaǵan. Sebebi bul demalys túri jabaıy týrızm sanatyna jatady. Jazǵy týrıstik maýsymǵa daıyndyq sheńberindegi mańyzdy sharalardyń biri — baqylaý-ótkizý pýnktterin avtomattandyrý. Qazirgi ýaqytta pýnktti avtomattandyrý boıynsha konkýrs ótkizildi. Ol memlekettik satyp alýlar nátıjesine shaǵymdaný satysynda tur. Shaǵym qaralǵannan keıin jetkizýshi anyqtalady, — dep qosty park basshysy.
Avtomattandyrý júıesi Jasybaıdaǵy qos baqylaý-ótkizý pýnktterinde engiziledi. Demalys aımaǵyna kirý tólemi táýlik boıy avtomattandyrylǵan termınal arqyly alynady.
Buǵan deıin depýtattar Baıanaýyl ulttyq parki aýmaǵynda aǵyndy sýlardy tazartý jobasyn iske qosý qajet ekenin aıtqan.
