Sý basqan úıler sany azaıa bastady
ASTANA. KAZINFORM – Tótenshe jaǵdaılar mınıstrliginiń resmı ókili Dınara Nurǵalıeva ortalyq kommýnıkatsııalar qyzmetinde ótken brıfıngide eldegi tasqyn ahýalyn baıandady.
«Tasqynǵa qarsy júrgizilgen is-sharalardyń arqasynda 19 715 adam óz úılerine oraldy. Tasqyn bastalǵannan beri 118 180 adam, onyń ishinde 44 254 bala qutqarylyp, evakýatsııalandy. 113 852 mal qaýipsiz jerge aıdaldy. Qazirgi tańda 8 821 adam, onyń ishinde 3 885 bala evakýatsııa pýnkterin panalap júr. 4 370 úı men 2 737 aýladan sý buryldy. 10,5 mln astam tekshe metr qar sýy soryp shyǵaryldy, 3,4 mln qumqap jáne 1,4 mln tonnadan astam ınertti materıal tóseldi», — dedi resmı ókil.
Eske salsaq, mınıstrliktiń 18 sáýir, saǵat 16.00-degi aqparaty boıynsha, Aqtóbe, Qostanaı, Aqmola, Atyraý, Soltústik Qazaqstan oblystarynda 6 046 jer úı, men 1 130 aýla sý ortasynda turǵanyn málim etken.
Mınıstrlik ókiliniń sózinshe, Aqtóbe, Qostanaı, Aqmola, Atyraý, Soltústik Qazaqstan oblystarynda 5 989 jeke turǵyn úı men 1 091 aýla áli sý ortasynda tur.
«Apattar medıtsınasy ortalyǵynyń psıhologtary turǵyndarǵa tasqynmen baılanysty shuǵyl psıhologııalyq kómek kórsetip, aqparattyq qoldaý jasaý úshin táýlik boıy kezekshilik atqaryp jatyr. Jedel jeli telefonyna 1 971 qońyraý tústi», — deıdi Dınara Nurǵalıeva.
Qazirgi tańda tasqynmen kúreske eriktilerden bólek 44 137 adam, 4 642 tehnıka, 858 sý sorý quraly, 341 júzý quraly,
12 áýe kemesi jumyldyrylǵan.
«Aqtóbe, Qostanaı, Batys Qazaqstan, Aqmola, Qaraǵandy, Atyraý, Soltústik Qazaqstan jáne Ulytaý oblystarynyń 38 eldi mekeninde tabıǵı sıpattaǵy jergilikti aýqymdaǵy tótenshe rejımi jaǵdaı saqtalyp otyr. Azamattardy sý tasqyny kezeńinde qaýipsizdik sharalaryn saqtaýǵa shaqyramyz. Balalardy qaraýsyz qaldyrmańyzdar. Úı men evakýatsııa pýnkterinen tıisti ruqsatsyz ketpeńizder», — dedi TJM resmı ókili.
