Balqaraǵaıdan Pavlodar baǵytyna deıingi jol ýchaskesi ýaqytsha jabylady
ASTANA. KAZINFORM — 3-13 mamyr aralyǵynda KZ 01-01 «Astana qalasynyń aınalma joly» avtomobıl jolynyń ýchaskesinde ortasha jóndeý jumystary júrgiziledi.
Osyǵan baılanysty jóndeý jumystary kezeńinde Balqaraǵaı demalys aımaǵynyń burylysynan bastap Pavlodar baǵytyna shyǵatyn kólik aıryǵyna deıingi jol ýchaskesinde kólik qozǵalysy tolyqtaı ýaqytsha toqtatylady. Jabylatyn ýchaskeniń uzyndyǵy 8 shaqyrym.
Atalǵan aralyqta jol jabynyn joný, jol negizindegi aqaýlardy joıý jáne eki qabatty asfaltbeton tóseý jumystary josparlanǵan. Jumystarǵa 25 jol jumysshysy men 66 birlik arnaıy tehnıka, onyń ishinde frezalar, asfalt tósegishter jáne júk kólikteri jumyldyrylady.
Tómengi jáne joǵarǵy asfalt qabattaryn tóseý arasynda tehnologııalyq úzilis qarastyrylǵan. Osy kezeńde kólik qozǵalysy ýaqytsha ashylatyn bolady.
Qozǵalysty tolyq shekteý jol qozǵalysy qaýipsizdigin qamtamasyz etý, jol-kólik oqıǵalarynyń aldyn alý jáne jóndeý jumystaryn sapaly ári belgilengen merzimde aıaqtaý maqsatynda engizilip otyr.
Júrgizýshilerden saparlardy aldyn ala josparlaýdy, ýaqytsha shekteýlerdi eskerýdi jáne júrgizilip jatqan jumystarǵa túsinistikpen qaraýdy suraımyz. Respýblıkalyq mańyzy bar avtomobıl joldarynyń jaı-kúıi týraly qosymsha aqparatty 1403 baılanys ortalyǵy arqyly alýǵa bolady.
Aıta ketelik Úlken Almaty kóline kólikpen barýǵa shekteý qoıylǵan edi.
