Sý basqan Qulsarydan bir adamnyń múrdesi tabyldy

ATYRAÝ. KAZINFORM – Tasqyn sý basqan Qulsaryda ákesi men balasy joǵalyp ketken edi. Búgin ákesiniń múrdesi tabyldy. 

Atyraý oblystyq tótenshe jaǵdaılar departamenti qoǵammen baılanys tobynyń aqparatyna súıensek, 14 sáýirde tańǵy saǵat 09:00 shamasynda tabylǵan.

«Qulsary qalasynda 6 sáýirde ákesi men balasy birge joǵalyp ketken edi. Ákesi 1976 jylǵy, al bala 2000 jyly týǵan. Olar ruqsat etý qujatynsyz sý basqan turǵyn úıin qaraý úshin barǵan. Alaıda, olar evakýatsııalyq pýnktke keri oralmaǵan. Sol kúnnen beri joǵalyp ketken ákesi men balasy izdestirildi», -dep habarlady departamenttiń qoǵammen baılanys toby.

Іzdestirý jumystaryna 40 qyzmetker, 6 júzý quraly, 1 birlik tehnıka jumyldyryldy.

Eske sala ketelik, budan buryn Qulsaryda sý tasqyny kezinde eki adam joǵalyp ketkeni habarlanǵan edi.