Study in Kazakhstan kórmesi elimizdiń 14 qalasynda ótedi
ASTANA. KAZINFORM — Qazaqstanda talapkerlerge arnalǵan iri bilim berý jobalarynyń biri – Study in Kazakhstan joǵary bilim kórmesi bastaldy. Bul týraly Ǵylym jáne joǵary bilim mınıstrliginiń baspasóz qyzmeti habarlady.
Joba elimizdiń 14 qalasyn qamtyp, 6000 shaqyrymnan astam aýmaqty biriktiredi.
Jobanyń basty maqsaty – talapkerlerge Qazaqstandaǵy jetekshi joǵary oqý oryndary men elimizde ashylǵan sheteldik ýnıversıtetter fılıaldarynyń bilim berý múmkindikterin keńinen tanystyrý. Іs-shara aıasynda qatysýshylar bilim berý baǵdarlamalary, memlekettik granttar, qabyldaý talaptary men oqý erekshelikteri týraly tolyq aqparat ala alady.
Іs-shara 7-25 sáýir aralyǵynda Astana, Pavlodar, Semeı, Óskemen, Qaskeleń, Almaty, Taraz, Shymkent, Túrkistan, Qyzylorda, Aqtóbe, Atyraý, Aqtaý jáne Jańaózen qalalarynda ótedi.
Jobanyń alǵashqy kúni 7 sáýirde Astana qalasynda ótti. Aýqymdy is-sharaǵa elimizdiń 50-ge jýyq joǵary oqý orny qatysyp, 10-11 synyptyń 2500-den astam oqýshysy jınaldy.
Saltanatty ashylý barysynda Astana qalasy Bilim basqarmasynyń basshysy Qasymhan Senǵazyev pen QR Ǵylym jáne joǵary bilim mınıstriniń keńesshisi Rýslan Emelbaev sóz sóılep, jastarǵa sapaly bilim alýdyń mańyzdylyǵyn atap ótti. Sonymen qatar oqýshylarǵa arnalǵan tanymdyq baǵdarlama uıymdastyrylyp, pedagog-proforıentolog Aıdos Jumanazar, UBT sarapshysy Farhat Sultabaev jáne bilim berý salasynyń sarapshysy Orazbek Ápsattar talapkerlerge mamandyq tańdaý men joǵary oqý ornyna túsý boıynsha baǵyt-baǵdar berdi.
Іs-shara aıasynda joǵary oqý oryndary men sheteldik ýnıversıtetter fılıaldarynyń ókilderi bilim berý baǵdarlamalarynyń erekshelikteri men qabyldaý erejelerine toqtalyp, talapkerler men ata-analardyń suraqtaryna jaýap berdi.
Jobanyń baǵdarlamasyna sáıkes 7 sáýirde Astanada bastalǵan is-shara 8 sáýirde Pavlodarda, 9 sáýirde Semeıde, 10 sáýirde Óskemende jalǵasady. Odan keıin 13 sáýirde Almatyda, 14 sáýirde Qaskeleńde, 15 sáýirde Tarazda, 16 sáýirde Shymkentte, 17 sáýirde Túrkistanda, 18 sáýirde Qyzylordada, 20 sáýirde Aqtóbede, 22 sáýirde Atyraýda ótedi. Al 24-25 sáýir kúnderi qorytyndy kezeńi Aqtaý men Jańaózen qalalarynda uıymdastyrylady.
Study in Kazakhstan – talapkerler úshin óz bolashaǵyn sanaly túrde josparlap, elimizdegi jáne halyqaralyq deńgeıdegi bilim berý múmkindikterimen tanysýǵa múmkindik beretin mańyzdy alań.
Aıta ketelik elordada jas ǵalymdardyń halyqaralyq saıysy bastalǵan edi.